کندهار (پژواک، ۱۷ تله ۱۴۰۲) کندهار کې سوداګر وایي، پاکستان په ناقانونه توګه د سیاسي فشار په موخه د دوی پر ترانزیټي توکو مالیه لوړه کړې، هغوی غوښتنه کوي چې افغان حکومت هم باید ورته اقدام وکړي.
دغه څرګندونې د کندهار د سوداګرۍ او پانګونې خونې مسوولینو او یو شمېر سوداګرو نن د یوه خبري کنفرانس پر مهال وکړې.
د کندهار د سوداګرۍ او پانګونې خونې رییس محمدصدیق مهمند وویل، د پاکستان حکومت د نړۍوال ترانزیټ او اپټا تړون خلاف پر ډېرو هغه توکو محصول لوړ کړی کوم چې د دغه هېواد له لارې افغانستان ته راوړل کېږي.
د هغه په وینا، افغان سوداګر هڅه کوي چې بدیله لار پيدا کړي ځکه پاکستان تل اصول تر پښو لاندې کوي او افغان سوداګرو ته ستونزې جوړوي.
هغه زیاته کړه: «موږ اضافه هیڅ نه غواړو خپل حق غواړو، پاکستان زموږ پر ترانزیټي مالونو غیرقانوني بندیز لګولی او پر ډېرو خوراکي او غیر خوراکي توکو یې بیا محصول لس سلنه لوړ کړی دی.»
هغه وایي، دا مهال د افغان سوداګرو ۱۵۰۰ کانټینره پاکستان کې بند پاتې دي چې له امله هره ورځ سوداګرو زیان ویني.
د سپينبولدک ولسوالۍ د سوداګرۍ خونې رییس محمدشفیق اڅکزي بیا وویل، افغان سوداګر د ترانزيټ پر بدیلې لارې کار کوي؛ ځکه پاکستان اکثره وخت دغه ډول ستونزې جوړوي.
هغه زیاته کړه: «موږ پر بدیلو لارو کار کوو، پاکستان د ټولو نړۍوالو ترانزيټي اصولو خلاف سوداګرو ته ستونزې جوړوي اوس موږ نه پوهیږو چې په دې کې پاکستان سیاسي فشار اچول غواړي او که څه موخه لري.»
یوه بل ملي سوداګر حاجي عتیق هم وویل، افغان سوداګر کولای شي په لږه اندازه زیان سره بدیلي لارې ولټوي خو پاکستان ځان ته تر ټولو ډېر زیان رسوي.
هغه زیاته کړه: «دوی چې په سیاسي لحاظ دا وسله او فشار د افغانستان اسلامي امارت پر وړاندې استعمالوي دا به ډېر د دوی په زیان وي، ځکه موږ کولای شو په درې – څلور میاشتو کې نورې لارې پيدا کړو.»
یوه بل ملي سوداګر محمدولي بیا غوښتنه وکړه چې اسلامي امارت دې د پاکستان د ترانزیټ پر وړاندې ورته عمل وکړي.
هغه وویل: «پاکستان منځنۍ اسیا ته مالونه وړي او له هغه هېوادونو نفتي مواد راوړي نو موږ هم باید د هغوی ترانزیټ ور بند کړو ځکه هغوی هیڅ کله زموږ سره صادقانه چلند نه دی کړی.»
په ورته وخت کې د صنعت او سوداګرۍ وزارت وياند عبدالسلام جواد پژواک اژانس ته وويل: «اپټا تړون پر خپل ځای ولاړ دی، شفاهي تفاهم شوی دی، پاکستان حکومت سره د اپټا تړون په اړه خبره شوې خو دې اواخرو کې متاسفانه چې ځيني مشکلات يې زموږ سوداګرو لپاره پيدا کړي دي.»
هغه وایي، د سوداګرۍ وزير او د اسلامي امارت نور مشران د دې ستونزې پر بنسټيزې حل لارې کار کوي او هڅه کېږي چې پر بديلو لارو هم کار وشي چې راتلونکي کې سوداګر له ستونزو سره مخ نه شي.
څو ورځې وړاندې په اسلاماباد کې د افغانستان سفارت هم ويلي وو چې پاکستان کې د افغان کډوالو پر ستونزو سربېره، په دې وروستیو کې دغه هېواد د اپټا تړون خلاف د افغان ترانزيټ او دوه اړخیزې سوداګرۍ په برخو کې خنډونه رامنځته کوي.
پاکستاني مسوولینو تر اوسه رسنیو ته په دې اړه څه نه دي ویلي.
غړيYou need to subscribe to view the full article. Please login or register a new account.
