<p style="text-align: justify;">کابل (پژواک، ۱۸ تله ۱۴۰۲): د ملګرو ملتونو د کډوالو عالي کمېشنري وایي، د دوی مسوولینو له پاکستاني چارواکو سره ناستې کړې او له هغوی یې غوښتي چې له افغان ګډوالو سره د نړۍوالو اصولو او قوانینو په رڼا کې چلند وکړي.</p>
<p style="text-align: justify;">د ګډوالو او بېرته راستنېدونکو چارو وزارت تېره شپه پر خپله اېکسپاڼه لیکلي، جبري راستنېدونکو ته د رسېدو په موخه د ګډوالو چارو وزارت او د ګډوالو په چارو کې د ملګرو ملتونو عالي کمېشنرۍ ترمنځ غونډه جوړه شوه چې په کې د دغه سازمان عملیاتي مرستیال سوبیر محمدابراهیم او د نړۍوالو اړیکو رییسې مېرمن سوارلیت بروین ګډون کړی و.</p>
<p style="text-align: justify;">دغه وزارت ویلي، په دې غونډه کې د کډوالو وزارت د دفتر رییس قاری محمداجمل ویاړ وویل، د دې ناستې موخه د راستنېدونکو لپاره یو میکانیزم چمتو کول دي.</p>
<p style="text-align: justify;">هغه زیاته کړه، دغه وزارت د ګډوالو عالي کمېشنرۍ همکارۍ ته اړتیا لري څو د هغو زرګونه کورنیو وضعیت ته رسېدنه وکړي چې راستنې شوې او یا هم د راستنېدو په حال کې دي.</p>
<p style="text-align: justify;">په دې غونډه د کډوالو په چارو کې د عالي کمېشنرۍ عملیاتي مرستیال سوبیر محمدابراهیم وویل، په پاکستان کې د یادې کمېشنرۍ چارواکو د افغان کډوالو د را ایستنې په اړه د دغه هېواد له مسوولینو سره منظمې ناستې کړې او له هغوی یې غوښتي چې له افغان کډوالو سره د نړۍوالو اصولو او قوانینو په رڼا کې چلند وکړي او له اخراج یې ډډه وکړي.</p>
<p style="text-align: justify;">هغه زیاته کړې، راتلونکې اونۍ به د افغانستان مسئله د جینوا د ځانګړې کمېټې په غونډه کې مطرح شي څو په ډیپلوماتیکو حللارو خبرې وشي.</p>
<p style="text-align: justify;">هغه ډاډ ورکړ چې په ولایتونو کې د دې کمېشنرۍ دفترونو خپل فعالیت زیات کړی او همکارۍ ته چمتو دي.</p>
<p style="text-align: justify;">نوموړی وایي، د راستنېدونکو وضعیت ته د رسېدو لپاره پر بېړني پلان کار کوي څو راستنېدونکو ته نغدي، خوراکي او غیرخوراکي مرستې چمتو کړي.</p>
<p style="text-align: justify;">دا په داسې حال کې ده چې د تلې په ۱۲مه د پاکستان سرپرست حکومت ویلي وو، که د نومبر میاشتې تر لومړۍ نېټې غیرقانوني افغان کډوال خپل هېواد ته ستانه نه شي، په زور به و ایستل شي.</p>
