سره میاشت: تېر یو کال کې مو بلخ کې نږدې ۹۰ زره کسانو ته روغتیايي خدمتونه وړاندې کړي

مزارشریف (پژواک، ۲۴ تله ۱۴۰۲): بلخ کې د افغاني سرې میاشتې ټولنه وایي، په تېر یو کال کې یې په دغه ولایت کې نږدې ۹۰ زره ناروغانو ته وړیا روغتیایي خدمتونه وړاندې کړي دي.

دغه څرګندونې د بلخ سرې میاشتې ټولنې رییس عبدالله شهکار په دغه ولایت کې د سرې میاشتې ځانګړې اونۍ د پیل مراسمو کې وکړې.

هغه وویل: «افغاني سرې میاشتې ټولنې تېر یو کال د بلخ په پنځو روغتیایي مرکزونو کې ۸۹۹۴۴ ناروغانو ته وړیا روغتیایي خدمتونه وړاندې کړي دي.»

هغه زیاتوي چې پر دې سربېره دې ټولنې په یاد ولایت کې له تېر یو کال راهیسې د ۵۱۳ پر زړه سوري ماشومانو درملنه هم کړې ده.

هغه دغه راز وویل چې یادې ټولنې د بلخ چهاربولک، شولګرې، زارې، چمتال، شورتیپه، کلدار، دهدادي او نهرشاهي ولسوالیو کې ۶۱۶۰ اړمنو، بېوزلو او بې‌ځایه شوو کورنیو ته خوراکي او غیرخوراکي توکي وېشلي دي.

د بلخ سرې میاشتې ټولنې د رییس په خبره، دې ټولنې له تېر یو کال راهیسې د ګمرک، املاکو، پاسپورټ او برېښناکوټ عوایدو او د ټکټونو د پلور له لارې شاوخوا ۱۱۸ میلیون افغانۍ عواید راټول کړي دي.

په همدې حال کې د افغاني سرې میاشتې ولایتي مجامع رییس طیب مبارک چې په دغو مراسمو کې یې ګډون کړی، له خیریه بنسټونو، سوداګرو، کسبه‌کارانو او عامه خلکو وغوښتل څو له افغاني سرې میاشتې سره د مرستې له لارې د بې‌وزلو او اړمنو خلکو لاسنیوی وکړي.

بلخوا په بلخ کې د سوداګرۍ او پانګونې خونې رییس اسدالله اسدي هم ډاډ ورکوي چې سوداګر د دې ټولنې ترڅنګ ولاړ دي او خپلې مرستې به ترې ونه سپموي.