<p style="text-align: justify;">اټلانټا (پژواک، ۸ لړم ۱۴۰۲): د یوه ورځني کرکټ نړۍوال جام سیالیو په لړ کې افغانستان سریلانکا ته په سترې ماتې ورکولو سره نه یوازې درېیمه بریا خپله کړه، بلکې د نومرو په جدول کې یې هم پنځم مقام خپل کړ.</p>
<p style="text-align: justify;">افغانستان خپله شپږمه لوبه د دوشنبې په ورځ د لړم په اتمه نېټه د هند په پونې ښار کې له سریلانکا سره ترسره کړه، د دې لوبې پچه افغانستان وګټله او لومړۍ یې سریلانکا د توپوهنې بلنه ورکړه.</p>
<p style="text-align: justify;">د سریلانکا لوبډلې ښه پیل وکړ خو وروسته د افغان توپاچوونکو د ښې لوبې له امله د سریلانکا لوبغاړي یو پر بل پسې سوځېدل، ټوله لوبډله یې په پنځوسم اوور کې په ۲۴۱ منډو وسوځېده او افغانستان ته یې د ۲۴۲ منډو هدف ورکړ.</p>
<p style="text-align: justify;">د افغانستان له لوري فضلحق فاروقي چې په تېره لوبه کې کېنول شوی و، دا ځل ورته بیا چانس ورکړل شو او هغه هم د څلورو لوبغاړو په سوځولو سره ځان ثابت کړ.</p>
<p style="text-align: justify;">دغه راز مجیب رحمن دوه، راشدخان او عظمت عمرزي یو یو لوبغاړي وسوځول.</p>
<p style="text-align: justify;">د یاد هدف ترلاسه کولو په موخه چې افغانستان لوبه پیل کړه، رحمنالله ګربز په صفر وسوځېد خو ورپسې لومړی ابراهیم ځدراڼ او رحمتشاه ښه ملګرتیا پیل کړه، د ابراهیم له سوځېدو وروسته لوبدلمشر شهیدي او رحمتشاه ښه ملګرتیا وکړه.</p>
<p style="text-align: justify;">د رحمتشاه له سوځېدو وروسته عظمت عمرزی راغی او له لوبډلمشر حشمت سره یې تر اخره ملګرتیا وکړه او لوبډلې ته یې بریا ورپه برخه کړه.</p>
<p style="text-align: justify;">د افغانستان له لوري ابراهیم ځدراڼ ۳۹، رحمت شاه ۶۲، حشمت شهیدي ۵۸ او عمرزي ۷۳ ناسوځېدلې منډې جوړې کړې.</p>
<p style="text-align: justify;">فضلحق فاروقي د لوبې غوره لوبغاړی اعلان شو.</p>
<p style="text-align: justify;">په دې بریا سره افغانستان د روان نړۍوال جام د نومرو په جدول کې پنځم مقام خپل کړ، هند لومړی، افریقا دویم، نیوزیلینډ درېیم او اسټرالیا په څلورم مقام کې دي.</p>
<p style="text-align: justify;">دغه راز سریلانکا شپږم، پاکستان اووم، نیدرلینډ اتم، بنګلهدېش نهم او انګلیستان په لسم مقام کې ځای لري.</p>
<p style="text-align: justify;">افغانستان له دې وروسته له سوېلي افریقا، اسټرالیا او نیدرلینډ سره لوبې لري.</p>
