<p style="text-align: justify;">کابل (پژواک، ۱۱ لړم ۱۴۰۲): د ماشومانو ساتنې نړۍوال سازمان (Save the Children) ویلي چې له پاکستانه د ورځې سلګونه ماشومان پرته له کومو امکاناتو افغانستان ته راځي.</p>
<p style="text-align: justify;">دغه سازمان پرون په یوه اعلامیه کې لیکلي چې تېرو شپږو میاشتو کې څه باندې ۱۲۰ زره افغان کډوال له خپلو ماشومانو سره له کومو امکاناتو پرته له پاکستانه هېواد ته راستانه شوي دي.</p>
<p style="text-align: justify;">په افغانستان کې د ماشومانو ساتنې نړۍوال سازمان رییس ارشد ملک ویلي: «سرحد د ماشومانو ځای نه دی؛ دغه ماشومان هغه ځای ته اړتیا لري چې هغه ته کور ویل کېږي؛ ډېری ماشومان او کورنۍ یې له هيڅ شي پرته راستنیږي، هغوی له دغه وضعیت وروسته ثبات ته اړتیا لري.»</p>
<p style="text-align: justify;">دغه بنسټ زیاته کړې، ځيني افغان ماشومان په پاکستان کې زېږېدلي او په لومړي ځل افغانستان ته راځي.</p>
<p style="text-align: justify;">پاکستان له دې مخکې هغو افغان کډوالو ته چې دغه هېواد کې د اوسېدو قانوني اسناد نه لري د روان کال د نومبر میاشتې تر لومړۍ نېټې مهلت ورکړی و چې دا هېواد پرېږدي، که نه په زور به وایستل شي.</p>
<p style="text-align: justify;">خو دا په داسې حال کې ده چې ځينو راستنېدونکو ویلي وو چې د پاکستان پولیسو ځيني هغه افغان کډوال هم نیولي چې د کډوالۍ قانوني اسناد یې لرل.</p>
<p style="text-align: justify;">د پاکستان دغه اقدام د ملګرو ملتونو، بشري حقونو او د لوېدیځو هېوادونو سفارتونو غبرګونونه راپارولي، خو بیا هم پاکستاني چارواکو د لړم میاشتې په ۱۰مه د افغان کډوالو د ایستلو لړۍ پیل کړه او تراوسه زرګونه کسان خپل هېواد ته راستانه شوي دي.</p>
<p style="text-align: justify;">حکومت د راستنېدونکو کډوالو لپاره په تورخم کې دوه کمپونه جوړ کړي او هغوی ته لومړني خدمات وړاندې کېږي.</p>
<p style="text-align: justify;">ذبیحالله مجاهد پر خپله اېکسپاڼه له پاکستانه د افغان کډوالو د ایستلو په اړه د اسلامي امارت اعلامیه خپره کړې؛ په اعلامیه کې راغلي له پاکستانه غوښتل شوي چې د اسلامي اخوت او د بشري عاطفې له مخې دې افغان کډوال له دغه هېواده په زور نه باسي.</p>
<p style="text-align: justify;"></p>
