<p style="text-align: justify;">اټلانټا (پژواک، ۱۹ لړم ۱۴۰۲): د هېواد ملي سوداګر او د عزیزي بنسټ مشر میرویس عزیزي هېواد ته په اجباري توګه له پاکستان او ایرانه راستنېدونکو کډوالو سره د ۳۰۰ میلیون افغانیو مرسته اعلان کړه.</p>
<p style="text-align: justify;">هغه د لړم په ۱۹مه، پر اېکس پاڼې (پخواني ټویټر) لیکلي: «له پاکستان څخه د افغان کډوالو له اجباری اېستلو وروسته چی کوم بشری بحران رامنځته شوی زما ژوره اندیښنه یی را پارولې.»</p>
<p style="text-align: justify;">عزیزي زیاته کړې چې له پاکستانه راستنېدونکو افغانانو سره د عزیزي بنسټ له خوا د درې سوه میلیون افغانیو په ارزښت بېړنۍ مرسته اعلانوي.</p>
<p style="text-align: justify;">د نوموړي په وینا، په دې مرستو کې به پر خوراکي توکو سربېره د ژمي جامې او نور اړین توکي شامل وي.</p>
<p style="text-align: justify;">د عزیزي بنسټ مشر وایي: «سبا به زموږ پلاوي تورخم او سپین بولدک ته ولاړ شي څو د اړتیاوو کچې د تثبیت ترڅنګ له مربوطه چارواکو سره په همغږۍ د دغو مرستو رسولو لړۍ پيل کړی.»</p>
<p style="text-align: justify;">د یادونې ده، د پاکستان له خوا د افغان کډوالو په زور او جبر له ایستلو وروسته شاوخوا ۲۰۰ زره افغانان هېواد ته راستانه شوي دي چې یو شمېر یې په کمپونو کې بې برخلیکه پراته دي.</p>
