اروپايي ټولنې افغانستان کې له اړمنو د ملاتړ په موخه ۲۵ میلیون یورو مرسته وکړه

کابل (پژواک، ۲۹ لېندۍ ۱۴۰۲): د خوړو نړۍوال پروګرام (ډبلیواېف‌پي) اعلان کړی چې اروپايي ټولنې په افغانستان کې اړمنو ته د رسېدنې لپاره ۲۵ میلیون یورو مرسته کړې ده.

ډبلیواف‌پي پر خپله اېکس‌پاڼه د یوه پیغام په خپرولو له افغانستان سره د اروپايي ټولنې له دې مرستې خبر ورکړی او زیاته کړې یې ده چې دغه مرسته به په ټول هېواد کې د امېدواره او شیدې ورکوونکو ښځو د ملاتړ، اړمنو کورنیو او خوارځواکو ماشومانو درملنې لپاره ولګول شي.

افغانستان کې د اروپايي ټولنې د بشري مرستو عملیاتي مسوول فرانسوا ګومانز ویلي، د افغانستان له هرو درېیو وګړو یو یې نه پوهېږي چې د بل څاښت خواړه خوري به له کومه کوي او د دغه هېواد خلک له سخت ژمي سره مخ دي.

هغه زیاته کړې، اروپايي ټولنه د هغو افغانانو ترڅنګ چې د بقا لپاره د ژوند ژغورنې مرستو ته اړتیا لريِ، ولاړه ده.

د خوړو د نړۍوال پروګرام د معلوماتو له مخې، په ۲۰۲۳ مېلادي کال کې له افغانستان سره د اروپايي ټولنې ټولې مرستې ۷۳.۷ میلیون یورو ته رسېږي.

دغه مرسته داسې مهال شوې چې د ژمي په را رسېدو سره بشردوستانه مرستو ته د خلکو د اړتیا کچه لوړه شوې ده.