<p style="text-align: justify;">کابل (پژواک، ۳ مرغومی ۱۴۰۲:( ډاکټران وايي، د هوا په سړېدو سره د تنفسي ناروغیو خپرېدو کچه لوړېږي چې په ځینو مواردو کې په ناروغ کې د سینوزیت رامنځته کېدو لامل هم ګرځي او په دې ناروغۍ اخته کس باید د ماسک کارولو ترڅنګ، ځان ګرم وساتي او ګرم مایعات وڅښي. </p>
<p style="text-align: justify;"><a href="https://www.darmankade.com/blog/chronic-sinusitis/">سینوزیت</a> (د پزې او سینوسونو میکروبي کېدو) ناروغي ډېر ډولونه لري چې په ټوله کې له زکام او حساسیته پیلېږي او د بویايي او ذایقې حس کمزوري کېدل، ټوخی، د ستوني درد، نفس تنګي، د سر درد او تبه د دې ناروغۍ نښې دي.</p>
<p style="text-align: justify;">ډاکتران سپارښتنه کوي چې په تنفسي او سینوزیت ناروغیو اخته کسان باید د ماسک کارولو ترڅنګ، له ګرمو مایعاتو ډېره استفاده وکړي او ځان ګرم وساتي.</p>
<p style="text-align: justify;"> په «یُسرا میډیکل کمپلېکس» خصوصي روغتون کې د غوږونو، ستوني او پزې کلینیکل پروفیسور ډاکټر رحمتشاه بابک پژواک خبري اژانس ته وویل چې د کال په دې موسم کې معمولاً د هوا په سړېدو د تنفسي ناروغیو او زکام خپرېدو کچه لوړیږي.</p>
<p style="text-align: justify;">د سرچینې د معلوماتو پر بنسټ، هره ورځ څه باندې دوولس پر سینوزیت اخته ناروغان دغه روغتون ته مراجعه کوي.</p>
<p style="text-align: justify;">هغه وویل: «سینوزیت د سینوسونو د میکروبي کېدو په مانا دی چې له ویروسونو او انتانونو پیدا کېږي او په مزمن حالت کې کېدای شي د فنګس، باکتریا او یا ویروسونو په بڼه رامنځته شي.»</p>
<p style="text-align: justify;">هغه زیاته کړه چې سینوزیت (د پزې د مجرا میکروبي کېدل) د زکام او رېزش ویروس له امله رامنځته کېږي چې انفلونزا او ګریپ هم ورته وايي او کله چې د بدن مقاومت کم شي د مکروبي کېدو لامل ګرځي.</p>
<p style="text-align: justify;">د هغه په خبره، د سترګو پړسوب، شدیده تبه، د ځان درد، کسالت، زړه بدوالی او کانګې د سینوزیتونو نښې دي.</p>
<p style="text-align: justify;">هغه سپارښتنه وکړه چې پر دې ناروغۍ اخته کسان باید لومړۍ څلور ورځې تر جدي مراقبت لاندې وي، ناروغ باید د ځان ګرم ساتلو ترڅنګ ګرم مایعات وڅښي او د درد او میکروب ضد درمل هم ورکړل شي.</p>
<p style="text-align: justify;">هغه له روغو کسانو وغوښتل چې له کوره د وتلو پر مهال خامخا ماسک وکاروي او د شپې له خوا له ویده کېدو مخکې د اوبو او مالګې محلول غرغره کړي.</p>
<p style="text-align: justify;">بلخوا، ناروغان هم د هوا له ککړتیا شکایت کوي.</p>
<p style="text-align: justify;">د کابل ښار د قلعهچې اوسېدنکی نورجهان چې له درېیو اونیو راهیسې د سینوزیت پر ناروغي اخته دی او د درملنې لپاره «یُسرا میډیکل کمپلېکس» خصوصي روغتون ته راغلی، وايي، په دې موده کې څو نورو ډاکټرانو ته هم ورغلی خو تر اوسه نه دی روغ شوی.</p>
<p style="text-align: justify;">هغه زیاته کړه: «تبه، ځان دردي او د سر درد راته پیدا دي او هرڅومره دوا مې چې واخیسته، ښه نه شوم، اوس دلته راغلم، ډاکټر راته وویل چې سینوزیت یې، درمل یې راکړل، ګورم چې څه کېږي.»</p>
<p style="text-align: justify;">هغه د کال په دې موسم کې د هوا سړېدو او ککړتیا په اړه اندېښنه څرګنده کړه او د خپلې ناروغۍ اصلي لامل یې سړه هوا وبلله.</p>
<p style="text-align: justify;">دغه راز یو ناروغ عرفان چې پر زکام اخته دی او دغه روغتون ته راغلی، وايي: «رېزش شوم، غوږونه او ستونی مې سخت درد کوي، ورور مې ډاکټر ته راوستم، اوس یې درمل او سیروم راکړل، ګورم چې څه کېږي.»</p>
<p style="text-align: justify;">هغه هم د خپلې ناروغۍ لامل د هوا سړېدل او ککړتیا بولي.</p>
