<p style="text-align: justify;">کابل (پژواک، ۴ مرغومی ۱۴۰۲): یوه خصوصي خیریه بنسټ کابل کې د هغو ۵۰ جوړو د واده ګډ مراسم جوړ کړل چې د اقتصادي ستونزو له امله یې د دغو مراسمو د لګښت توان نه درلود.</p>
<p style="text-align: justify;">دغه مراسم د «سېلاب خیربه بنسټ» له لوري د یادو جوړو د سلګونو خپلوانو په ګډون، نن د کابل ښار په یوه خصوصي هوټل کې ترسره شول.</p>
<p style="text-align: justify;">د سېلاب خیریه بنسټ مشر سیداحمد سېلاب په دغو مراسمو کې وویل چې دغه بنسټ له ۱۳ کلونو راهیسې افغانستان کې د لوړ ولور او په ودونو کې د بېځایه لګښتونو د مخنیوي لپاره مبارزه کوي.</p>
<p style="text-align: justify;">دی وایي چې ننني مراسم یې د هغو پنځوسو جوړو لپاره جوړ کړي چې د اقتصادي ستونزو له امله یې په یوازې ځان د واده کولو توان نه درلود.</p>
<p style="text-align: justify;">هغه د جزییاتو له ورکولو پرته وویل چې په نننیو مراسمو له شپږ میلیونه افغانیو ډېر لګښت راځي چې زیاته برخه یې یاد بنسټ او نور یې ځینې خصوصي شرکتونه ورکوي.</p>
<p style="text-align: justify;">د هغه په وینا، په نننیو مراسمو کې هرې جوړې ته د کور د اړتیا وړ۱۶۰ قلمه وسایل هم ورکړل شوي دي.</p>
<p style="text-align: justify;">د ده په خبره، د یادو پنځوسو ځوانانو له کوژې تر شپږو کلونو ډېر وخت تېر شوی او اوس د هغوی خسرګنۍ د یاد بنسټ په غوښتنه ولورونه معاف کړي دي.</p>
<p style="text-align: justify;">محمدکبیر یو له هغو کسانو دی چې شاوخوا شپږ کاله مخکې یې کوژده کړې وه، خو د واده کولو توان یې نه درلود او نن یې د واده مراسم تر سره شول.</p>
<p style="text-align: justify;">هغه له یاد بنسټ او هغو شرکتونو مننه وکړه چې نن یې د واده ګډ مراسم جوړ کړي وو.</p>
<p style="text-align: justify;"> ده پژواک خبري اژانس ته وویل، په ټولنه کې باید لوړ ولور او نور ناوړه رواجونه له منځه لاړ شي څو ځوانان کلونه د واده لپاره انتظار و نه کړي.</p>
<p style="text-align: justify;">احمدزی هم هغه ځوان دی چې نن یې د واده مراسم ترسره شول.</p>
<p style="text-align: justify;">هغه وايي، ډېرې ځوانان د ولور د پوره کولو لپاره سختو او خطرناکه کارونو ته مخه کوي چې یا خپل ژوند له لاسه ورکوي او یا هم وروسته له ډېرې مودې واده کوي.</p>
<p style="text-align: justify;">د افغانستان په ځینو ولایتونو کې له ۴۰۰ زره تر څه باندې یو میلیون افغانیو ولور اخیستل کېږي او د ولور تر څنګ ډېر نور لګښتونه هم لري.</p>
<p style="text-align: justify;">له همدې امله ځینې ځوانان کوژده نه شي کولای او یا اړ کیږي چې ایران او نورو هېوادونو کې کلونه کلونه کار وکړي څو د واده لګښتونه پوري کړي.</p>
