<p style="text-align: justify;">کابل (پژواک، ۱۶ مرغومی ۱۴۰۲): د پاکستان او افغانستان د سرحدونو مدیریت کمېټې هوکړه کړې چې د تورخم بندر له لارې د دواړو لورو باروړونکو موټرو د تګ راتګ کچه په ورځ کې له ۶۰۰ څخه ۹۰۰ ته لوړه کړي.</p>
<p style="text-align: justify;">د افغانستان د سوداګرۍ او پانګونې خونې د مدیره پلاوي غړي خانجان الکوزي پژواک خبري اژانس ته وویل چې د تورخم بندر له لارې د باروړونکو موټرو د تګ راتګ پر ډېرولو هوکړه شوې ده.</p>
<p style="text-align: justify;">هغه وایي چې د افغانستان او پاکستان د سرحدونو مدیريت کمېټې دوه ورځې مخکې دغه پرېکړه کړې ده.</p>
<p style="text-align: justify;">د الکوزي په خبره، تر اوسه د تورخم له لارې د ورځې ۳۰۰ موټر له افغانستانه پاکستان ته ځي او د ورځې ۳۰۰ موټر له پاکستانه افغانستان ته راځي، خو د ګډې کمېټې له تازه پرېکړې سره سم به پر دې دروازې د تلونکو او راتلونکو موټرو شمېر په ټولیز ډول ۹۰۰ ته لوړ شي.</p>
<p style="text-align: justify;">دی یاده پرېکړه ستایي او هیله څرګندوي چې عملي شي.</p>
<p style="text-align: justify;">د پاکستان <strong><a href="https://www.radio.gov.pk/04-01-2024/pak-afghan-border-committee-agrees-to-expedite-crossover-of-vehicles-on-daily-basis">راډیو</a> </strong>هم خبر ورکړی چې یاده هوکړه د پاکستان او افغانستان د سرحدونو مدیریت کمېټې په تورخم کې د یوې غونډې پر مهال کړې ده.</p>
