<p style="text-align: justify;">کابل (پژواک، ۱۷ مرغومی ۱۴۰۲): د خوړو نړۍوال پروګرام اعلان کړی چې تېر مېلادي کال یې افغانستان کې له زیانمنو سره د څه باندې۳۵۰ زره ټنه خوراکي توکي مرسته کړې ده.</p>
<p style="text-align: justify;">دغه سازمان نن (یکشنبه) پر خپله اېکسپاڼې د یوې خبرپاڼې په خپرولو سره ټینګار کړی چې د ننګونو سربېره به خپلو مرستو ته دوام ورکوي.</p>
<p style="text-align: justify;">دغه مرسته په داسې حال کې شوې چې ملګرو ملتونو په خپل وروستي راپور کې افغانستان د هغو هېوادونو په نوملړ کې راوستی چې د خوراکي توکو له کمښت سره مخ دي.</p>
<p style="text-align: justify;">د دغه سازمان په راپور کې چې تېر کال د ډسمبر په ۱۱مه خپور شو راغلي چې په ۲۰۲۳ کال کې د افغانستان په ګډون په ۵۳ هېوادونو کې ۲۵۸ میلیونه کسان د خوراکي توکو له کمښت سره مخ وو.</p>
<p style="text-align: justify;">د ملګرو ملتونو د بشري مرستو همغږي کوونکي دفتر (اوچا) د معلوماتو له مخې، له ۲۰۲۳ کال راهیسې څه باندې ۲۹ میلیونو افغانان بشري مرستو ته اړتیا لري چې له پاکستان او ایرانه د زرګونو افغان کډوالو په ایستلو سره دغه شمېر زیات شوی دی.</p>
