د کور او ښار جوړونې وزیر: په ټول هېواد کې مو شاوخوا ۹۰۰ زره جريب ځمکه له غصبه راګرځولې

کابل (پژواک، ۱۸ مرغومی ۱۴۰۲): د کور او ښار جوړونې وزارت سرپرست وايي، تېرو څه باندې دوو کالونو کې يې شاوخوا ۹۰۰ زره جريب ځمکه چې ډېری يې په ننګرهار او بلخ کې وه، له غصبه راګرځولې او د ځمکو بانک ته يې سپارلې ده.

د یاد وزارت سرپرست حمدالله نعماني له پژواک خبري اژانس سره په ځانګړې مرکه کې وويل، ډېر شمېر هغه ستونزې یې حل کړي چې له تېرې حکومت څخه ورته پاتې وې.

د هغه په خبره، د دولتي ځمکو غصب او ښاري سرغړونې هغه ستونزې وې چې توانیدلي حل یې کړي.

نوموړی وايي، «د نوي کابل» پر پروژې هم کار روان دی چې راتلونکی کال کې به يې د سړکونو جوړولو، اوبو رسولو او استملاک چارې پيل شي.

د هغه په وينا، «د نوي کابل» په سيمه کې خلکو ته پلانونه ورکړل شوي چې څه ډول په دغه سيمه کې ابادي وکړي.

هغه زیاته: «پخوا د نوي کابل پروژې دغه ځمکه د زورواکو او غاصبانو په لاس کې وه او ځينو شرکتونو هم غصب کړې وه چې دوی د تدريجي پروسې په عملي کولو او نورو اړوندو وزارتونو په همغږۍ او د تصفيې ټيمونو په مرستې سره اوس بېرته راګرځولې ده.»

نعماني دغه راز وويل، له دې وړاندې په کابل او یو شمېر ولايتونو کې ځيني ښارګوټي جوړ شوي چې ودانیزې سرغړونې یې کړي، معیاري نه دي او یا یې هم شنې سيمې غصب کړې دي چې د غصب د مخنيوي کمېسيون له لوري په نښه شوي او له دې وروسته به ورته د حل لار پيدا کړي.

هغه زياته کړه، د پنځم مکروريانو استوګنیز ښارګوټي موضوع له فساده ډکه ده او د ودانیزو ستونزو ترڅنګ حقوقي ستونزې لري او همدارنګه یې په نقشه کې د دولتي او شخصي ځمکه تصفیه هم په سمه توګه نه ده ترسره شوې.

نوموړی وايي، د یاد ښارګوتي د رغونې چارې به د ستونزو له حل وروسته پیل کړي.

د نعماني په خبره، یاد وزارت سږ کال د ميدان‌ښار ترمينل لپاره پراختیایي بودجه ترلاسه کړې او تازه یې د دې پروژې د فساد ستونزه هم حل کړې چې ډېر ژر به یې چارې پیل شي.

هغه وویل: «دا پروژه په تېر نظام کې يو چا د شخصي ګټو لپاره له ښاره لرې يوه غره ته وړې وه چې زموږ او اړوندو نورو وزارتونو په هڅو بېرته ميدان‌ښار مرکز ته راوړل شوه.»

د نوموړي په خبره، ياد وزارت دا مهال د NTA قراردادي کارکوونکي نه ‌لري؛ ځکه سږ کال په هغه ډول چې دوی غوښتل خپلې پروژې پلې کړي، نه دي پلي شوي چې پر همدې اساس یې بودجه پر ځای پاتې او په مصرف نه ده رسېدلې.

هغه دغه راز وويل، په اداره کې يې ځکه تر اوسه نوي کسان پر دندو نه دي ګمارلي چې په شرایطو د برابرو کسان موندل ورته ستونزمن دي.

نعماني وايي، دغه وزارت د مسلکي کسانو له کمښت سره مخ دی.

هغه له پاکستانه د راستنېدونکو افغانانو په اړه وويل، د ملګرو ملتونو د کډوالۍ عالي کمېشنرۍ په مشرۍ د دايمي استوګنې په کمېټه کې پرېکړه شوې، هغه کډوال چې د تثبيت د کمېټې له لوري دغه وزارت ته ور پېژندل کېږي، دوی ورته ځمکې ورکوي.

نوموړی زياتوي، د کډوالو چارو له وزارت سره په همغږۍ تر اوسه په ۲۹ ولايتونو کې په ۲۳۰ زره جريبه ځمکه کې کډوالو ته د دايمي استوګنې کمپونه جوړ شوي دي.

هغه وايي، له تېر حکومته شاوخوا ۸۵۰ نيمګړې پروژې پاتې وې چې ډېر شمېر خيالي پروژې هم په کې شاملې دي.

ده زياته کړه، دوی دغه پروژې اړوندو وزارتونو ته د بيا ليدو او څېړنې لپاره ور استولي چې د ماليې وزارت له لوري د بودجې له ورکړې وروسته به یې کارونه پيل شي.

دی وايي، د هغو غصب شوو ځمکو په اړه چې کورونه او ودانۍ ورباندې جوړې شوې، تراوسه کومه پرېکړه نه ده شوې.

د هغه په وينا، دغه وزارت اوسمهال يوازې له چین او قطر هېوادونو دوه ډونران لري، خو زیاتوي چې له نورو هېوادونو یې هم غوښتنه کړې چې تر اوسه یې کوم مثبت ځواب نه دی ترلاسه کړی.