<p style="text-align: justify;">کابل (پژواک، ۳۰ مرغومی ۱۴۰۲): د کاناډا د کډوالۍ او تابعیت اداره وايي چې ۳۱۹ افغان کډوال یې له پاکستانه دغه هېواد ته لېږدولي دي.</p>
<p style="text-align: justify;">د کاناډا د کډوالۍ او تابعیت ادارې (<a href="https://twitter.com/CitImmCanada/status/1748370570268336542">IRCC</a>) تېره شپه پر خپله اېکسپاڼه لیکلي چې یاد شمېر افغان کډوال له پاکستانه په یوه چارټر الوتکه کې د دغه هېواد وینکوور ښارته لېږدول شوي دي.</p>
<p style="text-align: justify;">سرچینې زیاته کړې، کاناډا د ۲۰۲۱ زېږدیز کال له اګسټ میاشتې راهیسې شاوخوا ۴۰ زره افغان کډوال دغه هېواد ته لېږدولي دي.</p>
<p style="text-align: justify;">د کاناډا د کډوالۍ او تابعیت ادارې وړمه ورځ هم له پاکستانه په یوه چارټر الوتکه کې د ۳۱۴ افغان کډوالو د لېږد خبر ورکړی و.</p>
