[restrict paid="true"]
خوست ښار (پژواک، ۶ سلواغه ۱۴۰۲): د اریانا افغان هوایي شرکت یو ځل بیا د خوست له نړۍوال هوایي ډګره متحده عربي اماراتو ته الوتنې پیل کړې.
دغه هوايي شرکت نن (د سلواغې ۶مه) د متحده عربي اماراتو له العين ښاره لومړی کابل او بیا له کابله د خوست ملکي نړۍوال هوايي ډګر ته خپله لومړنۍ الوتنه ترسره کړه.
د افغانستان ترانسپورت او هوايي چلند وزارت وياند امامالدين احمدي پژواک خبري اژانس ته وويل چې له دې وروسته به د اريانا افغان هوايي شرکت د هرې جمعې او دوشنبې ورځو کې له خوسته متحده عربي اماراتو ته الوتنې ولري.
هغه زیاته کړه: «دا د خوست ولس او په ټوله کې د لويې پکتيا لپاره ښه زيری دی، دوی کولی چې په رياض او نورو عربي هېوادونو کې مېشت خوستوال د کابل له لارې خوست ته سفر وکړي.»
ورته مهال، مسافرو او د خوست اوسېدونکو له دغه ولایته د نړۍوالو الوتنو پیل ته خوښي څرګنده کړه.
د سلطانمحمد منګل په نوم يوه مسافر چې د اريانا افغان هوايي شرکت په الوتکه کې یې نن له العينه خوست ته سفر درلود، له پژواک سره خبرو کې غوښتنه وکړه چې د پروازونو دغه لړۍ بايد دوامداره وساتل شي.
دی وايي: «زه ډېر خوښ شوم چې په لومړي ځل له اماراتو څخه خوست ته په طياره کې راغلم، زموږ مسافر عربي هېوادونو کې بېخي ډېر دي، شرکتونه بايد دې ته ډېر پام وکړي چې پروازونه په ټاکلي وخت ترسره کړي.»
د خوست يوه بل اوسېدونکي حاجي صبرک عليشېر هم پژواک اژانس ته وويل چې د دغو الوتنو له پيل سره به په متحده عربي اماراتو کې مېشتو خوستوالو ته ډېرې اسانتياوې برابرې شي.
نوموړي هم له مسوولينو غوښتنه وکړه چې دغه لړۍ بايد نمايشي بڼه خپله نه کړي او په دوامداره توګه بايد نوموړی شرکت خپل پروازونه ترسره کړي.
له دې وړاندې هم د خوست له هوايي ډګره متحده عربي اماراتو ته الوتنې پيل شوې خو د نامعلومو لاملونو له مخې بېرته وځنډېدې خو دا ځل يې مسوولين په دوامداره توګه د ترسره کېدو ډاډ ورکوي.
[/restrict]
