<p style="text-align: justify;">بامیان (پژواک، ۸ سلواغه ۱۴۰۲): د بامیان یو شمېر اوسېدونکي چې د خپلو پېژندپاڼو د تېروتنو د اصلاح لپاره د دغه ولایت احصایې ریاست ته یې مراجعه کړې په دې برخه کې د کار له ځنډه شکایت کوي، خو مسوولین وايي چې دغه ستونزه له پخوا وه او د حل لپاره یې کار روان دی.</p>
<p style="text-align: justify;">د هغوی په وینا، په ځینو مواردو کې معلومات په پېژندپاڼه او د نفوس د احوالو د ثبت په کتاب کې توپیر لري، د یوه توري په ډېرېدو او کمېدو سره له ستونزې سره مخ شوي دي.</p>
<p style="text-align: justify;">د بامیان ولایت د یکهولنګ ولسوالۍ اوسېدونکی عبدالواحد پژواک خبري اژانس ته وویل، ۱۵ ورځې کېږي چې د خپلې پېژندپاڼې د تېروتنې سمولو لپاره د ولایت مرکز ته راغلی او تراوسه نه دی توانېدلی چې خپله پېژندپاڼه اصلاح کړي.</p>
<p style="text-align: justify;">هغه زیاته کړه چې خپله تذکره یې په ۱۳۷۸ کال کې له یکهولنګ ولسوالۍ ترلاسه کړې چې د اړوندو کارکوونکو د بېغوري له امله په پېژندپاڼه او نفوس د احوالو د ثبت په کتاب کې د عبدالواحد په نوم کې د یوه توري «و» په توپیر سره اوس له څو ورځو راهیسې سرګردانه دی څو خپل نوم اصلاح کړي.</p>
<p style="text-align: justify;">هغه له اړوندو مسوولینو وغوښتل څو د پېژندپاڼو د وېش پر مهال د مراجعینو د ځانګړنو کره ثبتولو ته پاملرنه وکړي.</p>
<p style="text-align: justify;">بلخوا، د بامیان د پنجاب ولسوالۍ اوسېدونکی حسن هم چې د خپلې پېژندپاڼې د سمولو لپاره یې د احصایې ریاست ته مراجعه کړې په دې اړه وايي، نوم یې په پېژندپاڼه کې حسن ولي او د نفوس د احوالو د ثبت په کتاب کې حسین لیکل شوی دی.</p>
<p style="text-align: justify;">هغه زیاته کړه چې تراوسه کومه ستونزه نه وه، خو اوس چې یې د برېښنایي پېژندپاڼې د اخیستلو لپاره مراجعه کړې، مسوولینو ورته ویلي چې نوم یې د نفوس د احوالو د ثبت په کتاب کې حسین لیکل شوی تر څو چې اصلاح نه شي، برېښنایي پېژندپاڼه نه ورکول کېږي.</p>
<p style="text-align: justify;">یاده موضوع یوازې د کاغذي پېژندپاڼو برخه کې نه خلاصیږي، بلکه په برېښنایي پېژندپاڼو کې هم ورته ستونزې شته.</p>
<p style="text-align: justify;">د بامیان مرکز یوه اوسېدونکي قدرتالله وویل چې نوم یې په انګلیسي ژبه په برېښنایي پېژندپاڼه کې ناسم لیکل شوی او په وار وار مراجعې سره تراوسه اصلاح شوی نه دی.</p>
<p style="text-align: justify;">د هغه په وینا، بامیان کې له وېش وروسته خدمتونو تراوسه ندي فعال شوي او د برېښنایي پېژندپاڼې د اصلاح لپاره باید کابل ته مراجعه وکړي.</p>
<p style="text-align: justify;">بلخوا، مسوولین په دې اړه وايي چې داسې ستونزې له پخوا وي او دې برخه کې د کار د چټکتیا لپاره هڅې روانې دي.</p>
<p style="text-align: justify;">د بامیان د احصایې او معلوماتو ریاست د احصایوي خدمتونو امر محمدمحسن ظفري پژواک ته وویل چې یادې ستونزې د اسلامي امارت واک ته له رسېدو مخکې هم وې او اوس د مراجعینو د نوم اصلاح او برېښنایي پېژندپاڼو د وېش د اصلاح لپاره هڅې روانې دي.</p>
<p style="text-align: justify;">د هغه په وینا، د غوښتنې په وخت کې د مراجعینو د بېغورۍ، د پخوانیو کارکوونکو نه تسلط، د نفوس د احوالو د ثبت کتاب ورکېدو او کاپي کېدو له امله یادې ستونزې رامنځته شوې دي.</p>
<p style="text-align: justify;">نوموړي څرګنده کړه چې اوس د ولایت په کچه د املا او انشاء ستونزې حل شوې، وړ مامورین په دې برخه کې ګمارل شوي دي.</p>
<p style="text-align: justify;">هغه دغه راز زیاته کړې چې د روان کال له پیل څخه تراوسه د برېښنایي او کاغذي پېژندپاڼو او دې برخه کې له نورو خدمتونو له درکه څه باندې ۱۳ میلیون او ۸۷۶ زره افغانۍ هم ټولې شوې دي.</p>
