<p style="text-align: justify;">جلالاباد (پژواک، ۱۷ سلواغه ۱۴۰۲): د ننګرهار د کليو پراختیا او بيارغونې رياست مسوولين وايي، روان ۱۴۰۲ لمريز کال يې په دغه ولايت کې د ۱۱۳۶ ميليون افغانيو په لګښت د ګڼو پروژو کارونه پيل کړي چې له ډلې یې یو شمېر پروژې بشپړې شوې دي.</p>
<p style="text-align: justify;">د دغه رياست مسوولین وايي، په يادو پروژو کې د څښاک اوبو رسولو شبکو، سړکونو، کانالونو، پلیو لارو او ويالو بيارغونه او جوړول شامل دي.</p>
<p style="text-align: justify;">د ننګرهار د کليو پراختيا او بیارغونې رييس مولوي قسمتالله مبارز چې نن (د سلواغې ۱۷مه) يې د ننګرهار د اطلاعاتو او کلتور رياست له لوري اطلاعاتو ته د لاسرسي په اړه جوړ شوي خبري کنفرانس کې خبرې کولې، د خپلې ادارې فعاليتونو په تړاو يې له خبريالانو سره معلومات شريک کړل.</p>
<p style="text-align: justify;">نوموړي وویل، روان کال یې په دغه ولایت کې د ۴۳۳ ميلیون افغانیو په لګښت د پاکو اوبو رسولو ۱۲۱ شبکو جوړولو کارونه پيل کړي چې له ډلې يې ۴۷ بشپړې شوې او پر نورو يې کار روان دی.</p>
<p style="text-align: justify;">هغه زياته کړه چې دغو پروژو کې سلګونه کسانو ته د کار زمينه برابره شوې او په بشپړېدو به یې شاوخوا ۳۹ زره کورنۍ له پاکو اوبو برخمنې شي.</p>
<p style="text-align: justify;">د مبارز په خبره، د دې ترڅنګ یې د نړۍوال بانک د ۷۰۳ میلیون افغانیو په لګښت په پچیراګام، رودات، مومندرې او کوټ ولسوالیو کې هم ۵۲۱ بېلابېلې پروژې ترسره شوې چې ګڼې اسانتياوې يې د سيمې اوسېدونکو ته رامنځته کړې دي.</p>
<p style="text-align: justify;">د نوموړي معلوماتو له مخې، په يادو پروژو کې د ۳۵ کيلومتره استنادي دېوالونو، ۱۰۶۷ پلچکونو او ۹۰۰ متره په اوږدوالي سړکونو بيارغونه شامل دي او ۳۲ زره کسانو ته په کې د کار زمينه هم برابره شوې ده.</p>
<p style="text-align: justify;">هغه زیاته کړه چې روان کال یې د خوړو نړۍوال پروګرام له لارې په دغه ولایت کې له نږدې ۱۳۲ زره بېوزلو کورنيو سره د خوراکي توکو مرستې هم شوې دي.</p>
<p style="text-align: justify;">نوموړي وويل: «له ولس سره د بېلابېلو موسسو په همکارۍ مو تر دې مهاله ۱۳۰ زره او ۷۱۵ کورنیو ته مرستې وېشلې دي.»</p>
<p style="text-align: justify;">نوموړي زیاته کړه، د مالیې وزارت د نږدې ۵۷ ميليون افغانیو په لګښت ننګرهار کې یو شمېر نیمګړې پروژې هم بشپړې کړې دي.</p>
<p style="text-align: justify;">د کليو پراختیا او بيارغونې رييس دغه راز وويل، را روان کال هم د ورته نورو پروژو لپاره پلانونه جوړ شوي او هڅه کېږي چې تر ډېره په دغو پروژو کې اوزګاره کسانو ته د کار زمينه برابره شي.</p>
