<p style="text-align: justify;">جلالاباد (پژواک، ۱۸ سلواغه ۱۴۰۲): د ننګرهار د صنعت او سوداګرۍ رياست وايي، په دغه ولايت کې د سوداګرۍ، پانګونې او صنعت کچې د تېر په پرتله وده کړې او په روان کال کې شلو نوو توليدي فابريکو فعاليت پيل کړی دی.</p>
<p style="text-align: justify;">مسوولين وايي، په دغه ولايت کې د سوداګرۍ او پانګونې کچې زياتېدو لاملونه د برېښنا، صنعتي فابريکو او امنيت برخو کې د اسانتياوو رامنځته کېدل دي چې په تېر کې سوداګرو د دغو ستونزو له امله پانګونه نه کوله.</p>
<p style="text-align: justify;">د ننګرهار د صنعت او سوداګرۍ رييس سيد عبدالبصير پاچا وايي، په دغه ولايت کې د تېر په پرتله د اسانتياوو په زياتېدو سره سوداګرۍ او صنعت وده کړې ده.</p>
<p style="text-align: justify;">هغه زیاته کړه، د روان کال په اوږدو کې ۲۷۷ سوداګریزو شرکتونو ته نوي جوازونه ورکړل شوي چې لوی لامل يې د جواز ترلاسه کولو چارو کې د روڼتيا او اسانتيا رامنځته کېدل او د امنيت ټينګښت دی.</p>
<p style="text-align: justify;">هغه زياته کړه، په ننګرهار کې اوس ۳۷۰ فابریکې په بېلابېلو برخو کې فعالیت کوي چې له ډلې يې ۲۰ نوې فابريکې همدا روان کال جوړې شوې دي.</p>
<p style="text-align: justify;">د نوموړي په خبره، په دې فابريکو کې ۱۰ زره کسانو ته په مستقيم ډول د کار زمینه برابره شوې او ګڼ نور کسان په غيرمستقيم ډول ورسره په کارونو بوخت دي.</p>
<p style="text-align: justify;">د سوداګرۍ او صنعت رييس زياتوي چې د دغو فابريکو د فعاليت له امله د کورنيو توليداتو کچه هم لوړه شوې او ډېرو برخو کې د بهرنيو توکو وارداتو مخنيوي سبب ګرځېدلي دي.</p>
<p style="text-align: justify;">دی وايي: «سوداګرو او پانګوالو ته د برېښنا، صنعتي ښارګوټي، هلته د سړکونو او امنيت برخه کې اسانتياوې رامنځته شوې چې پخوا په دې برخه کې ستونزې ډېرې وې، نو ځکه سوداګرو هم په شیخ مصري ښارګوټي کې د پانګونې لېوالتيا ډېره کړې ده.»</p>
<p style="text-align: justify;">د سوداګرۍ رييس زياتوي، په ختيځ زون کې د صادراتي زون سل جریبه مناسبه ځمکه تثبیت شوې، اسناد یې لوړو مقاماتو ته انتقال شوي چې د دغه زون په رامنځته کېدو به په ننګرهار کې سوداګري لا وغوړېږي او ګڼو کسانو ته به په کې د کار زمینه برابره شي.</p>
<p style="text-align: justify;">ورته مهال، د ننګرهار ولايت اوسېدونکي او سوداګر هم په د غه ولایت کې د سوداګرۍ ودې ته خوښ دي.</p>
<p style="text-align: justify;">د ننګرهار يو سوداګر زلمی اعظيمي وايي، د شيخ مصري صنعتي پارک ترڅنګ بايد د غازي امانالله خان صنعتي پارک ته هم پاملرنه زياته شي څو هلته هم د فابريکو جوړېدو لپاره ښه زمينه برابره شي.</p>
<p style="text-align: justify;">دغه راز د جلالاباد ښار يو اوسېدونکی نيازمحمد وايي، ننګرهار کې د ډېرو ولایتونو اوسېدونکي اوسېږي چې دغه شان فابریکو په جوړېدو سره ورته د کار زمینه برابریږي.</p>
<p style="text-align: justify;">مسوولين وايي، هڅه کوي چې د سوداګرو او پانګوالو ستونزې حل او اسانتياوې ورته ډېرې کړي څو د پانګونې کچه ورسره لوړه شي.</p>
