<p style="text-align: justify;">کابل (پژواک، ۸ کب ۱۴۰۲): د راپورونو له مخې، د افريقا په الجزاير کې د نړۍ په کچه درېيم لوی او د افریقا په کچه تر ټولو لوی د «جامع الجزایر» په نوم جامع جومات پرانیستل شو.</p>
<p style="text-align: justify;">د الجزيرې د <strong><a href="https://www.aljazeera.com/news/2024/2/26/algeria-inaugurates-worlds-third-largest-mosque-ahead-of-ramadan">راپور</a> </strong>له مخې، د الجزایر ولسمشر عبدالمجید تبون د دوشنبې په ورځ د شمالي افریقا د مدیترانې په ساحل کې د الجزایر لوی جومات په رسمي ډول پرانیست.</p>
<p style="text-align: justify;">سرچینې لیکلي چې یاد جومات په یوه وخت کې د ۱۲۰ زره لمونځ کوونکو د ځایولو ظرفیت لري او دغه جومات له د سعودي عربستان تر حرم شریف او مسجد نبوي وروسته د نړۍ په کچه تر ټولو لوی جومات دی.</p>
<p style="text-align: justify;">په راپور کې راغلي، د ياد جامع جومات منار چې ۲۶۵ متره لوړوالي لري د نړۍ تر ټولو لوړ منار دی.</p>
<p style="text-align: justify;">د سرچينې د معلوماتو له مخې، د جومات مساحت ۲۰۰ زره متر مربع دی او د لمانځه لوی سالون یې په فيروزهيي فرش باندې فرش شوی دی.</p>
<p style="text-align: justify;">الجزیرې لیکلي چې یاد جومات د اوو کلونو په اوږدو کې د څه باندې ۹۰۰ میلیون ډالرو په لګښت، په عصري بڼه د یوه چینایي شرکت له خوا جوړ شوی او د چورلکې د ناستې ځای او یو کتابتون لري چې د یو ميلیون کتابونو د ساتلو وړتیا لري.</p>
