کابل (پژواک) – د ایران پوځ ویلي چې په کویټ کې یې په «عليالسالم» پوځي اډه کې د امریکايي ځواکونو هوايي دفاعي سیسټمونه او د توغندیو او بېپیلوټه الوتکو توغولو مرکزونه د بېپیلوټه الوتکو په وسیله په نښه کړي دي.
د ایران تسنیم خبري اژانس د دغه هېواد د پوځ د عامه اړیکو دفتر له قوله راپور ورکړی چې نن (چهارشنبه) سهار د ایران د پوځ بریدګرو بېپیلوټه الوتکو په کویټ کې د عليالسالم په پوځي اډه کې د امریکايي ځواکونو «پټریوټ» هوايي دفاعي سیسټمونه او د توغندیو او بېپیلوټه الوتکو توغولو مرکزونه په نښه کړي دي.
د ایران پوځ په خپله خبرپاڼه کې ویلي چې د عليالسالم هوايي اډه په سیمه کې د امریکا له مهمو پوځي اډو څخه ده او لوېدیځې اسیا ته د پوځي تجهیزاتو او ځواکونو د هوايي لېږد اصلي مرکز ګڼل کېږي.
د سرچینې په وینا، دغه اډه په سیمه کې د امریکايي ځواکونو په پوځي او لوژستیکي فعالیتونو کې مهم رول لري.
د ایران پوځ ټینګار کړی چې د دغه هېواد پر وړاندې به هر ډول ګواښ او برید ته پرېکنده ځواب ورکړي.
دا په داسې حال کې ده چې د کویټ چارواکو هم د بېپیلوټه الوتکو د بریدونو د مخنیوي خبر ورکړی دی.
تر اوسه د دغه برید د احتمالي مرګژوبلې او اوښتو زیانونو په اړه جزئیات نه دي خپاره شوي.
د یادونې ده، امریکايي جنګي الوتکو پرون د هرمز تنګي په قشم ټاپو کې د ایران د سپاه پاسداران اړوند د توغندیو توغولو یو مرکز په نښه کړی و، خو ایراني چارواکو ویلي چې دغه برید د قشم ټاپو زیربناوو ته زیان نه دی رسولی.
دغه متقابل بریدونه په داسې حال کې کېږي چې قطر او عمان د امریکا او ایران ترمنځ د کړکېچ کمولو او د جګړې پای ته رسولو لپاره خپلو ډیپلوماتیکو هڅو ته دوام ورکوي.









