<p style="text-align: justify;">فیضاباد (پژواک، ۲۹ کب ۱۴۰۲): د بدخشان ولایت په مرکز فیضاباد ښار کې نیالګي پلورونکي د نوي کال د پسرلي په رارسېدو سره د خپل پلور کچې له ټيټېدو شکایت لري او له خلکو غواړي چې د سمسورتیا او د میوې حاصلاتو برخه کې د ځان بسیاینې لپاره نیالګي وپېري او کینوي.</p>
<p style="text-align: justify;">فیضاباد ښار کې یو نیالګی پلورونکی سنتالله وايي، له یوولسو کلونو راهیسې نیالګي پلوري، د کندوز ولایت له چهاردرې او امامصاحب ولسوالیو اصلاح شوي مثمر او غیرمثمر نیالګي راوړي چې دغه کار له یوې خوا د هغه د ژوند ورځنۍ اړتیاوې پوره کوي او له بلې خوا د هېواد په سمسورتیا او ابادۍ کې برخه اخلي.</p>
<p style="text-align: justify;">هغه زیاتوي چې فیضاباد ښار او د دغه ولایت ولسوالیو ته یې له ۵۰۰ زره پر ډېر افغانیو د ناک، املوک، مڼې، شفتالو، چهارمغز، بادام، زردالو، انځر، آنار او غیر مثمر نیالګي لکه سفیدار، چنار، ناجو او مورپان راوړي، خو د تېرکال په پرتله یې خرڅلاو ۵۰ سلنه کم شوی دی.</p>
<p style="text-align: justify;">هغه د پېرودونکو نشتون د خپل کاروبار پر وړاندې تر ټولو مهمه ستونزه بولي او وايي چې د تېرکال په پرتله د ځانګړي تخفیف په درلودو سره سره بیا هم د ورځې له زر افغانیو څخه ډېر خرڅلاو نهلري.</p>
<p style="text-align: justify;">د فیضاباد ښار یو بل نیالګی پلورونکی معراجالدین وویل چې بدخشان کې د نیالګیو بازار مخ په پیکه کېدو دی او خلک د نیالګیو کېنولو ته چندان لېوالتیا نهلري، له همدې امله یې د تېرو کلونو په پرتله بازار ته کم نیالګي وارد کړي دي.</p>
<p style="text-align: justify;">هغه چې د کندوز د امام صاحب ولسوالۍ څخه یې نیالګي راوړي، وايي: «د بدخشان اصلاح شوي او معیاري نیالګي چې مناسبې بیې ولري، نه عرضه کېږي، له همدې امله اړ يو له نورو ولایتونو نیالګي راوړو.»</p>
<p style="text-align: justify;">هغه هم تاییدوي چې د خرڅلاو کچه یې ۵۰ سلنه ټیټه شوې او اندېښنه لري چې زیانمن نهشي.</p>
<p style="text-align: justify;">دغه نیالګي پلورونکي له خلکو غواړي چې بدخشان کې د میوې حاصلاتو ځان بسیاینې لپاره نیالګي وپېري او کېنوي.</p>
<p style="text-align: justify;">د فیضاباد ښار اوسېدونکی امام علي چې د نیالګیو پېرلو لپاره د نیالګیو ځای ته راغلی، وايي چې خلکو په تېرو کلونو کې په کافي اندازه نیالګي پېرلي او کېنولي دي.</p>
<p style="text-align: justify;">هغه زیاتوي چې په تېرو کلونو کې کېنول شوو نیالګي ښه پایله نه ده ورکړې او بلخوا د فیضاباد ښار اوسېدونکي د نیالګیو کېنولو لپاره مناسبه او اضافي ځای نه لري.</p>
<p style="text-align: justify;">امام علي دغه راز زیاته کړه چې د کورنیو بد اقتصادي وضعیت او د سمسورې فضا له ګټو پوهاوی نه درلودل په دغه ولایت کې د نیالګیو د بازار پیکه کېدو نور لاملونه دي.</p>
<p style="text-align: justify;">ورته مهال، د بدخشان د کرنې، اوبو لګولو او مالدارۍ رییس قاري قطبالدین دهنوي وايي چې د را روان کال لپاره یې له موسسو سره په همکارۍ ۲۵۰ زره مثمر او غیر مثمر نیالګي پېرلي او د دغه ولایت اوسېدونکو او خلکو ته به په وړیا توګه ورکړل شي.</p>
<p style="text-align: justify;">هغه مني چې د میوه لرونکو ونو ځینې باغچې چې په تېرو کلونو کې دغه ولایت کې د خلکو او موسسو له لوري جوړې شوې وې، د بدخشان له اقلیم سره د ونو نه همغږي له امله چندان پایله یې ورنه کړه او خلکو خپل باغونه له منځه ویوړل او کرنیزه ځمکې یې جوړه کړې، له همدې امله ډېر نیالګي نه پېري.</p>
