د بښنې نړۍوال سازمان له پاکستانه د افغان کډوالو ایستلو لړۍ د درېدو غوښتنه کوي

<p style="text-align: justify;">کابل (پژواک، ۸ وری ۱۴۰۳): د بښنې نړۍوال سازمان یو ځل بیا له پاکستانه د افغان کډوالو د ایستلو په اړه د اندېښنې په څرګندولو د دغه هېواد له نوي حکومته غوښتي چې د افغان کډوالو د ایستلو لړۍ ودروي.</p>

<p style="text-align: justify;">یاد سازمان پر خپله اېکس‌پاڼه لیکلي چې د افغان کډوالو د ایستلو په اړه د پاکستان پلانونه د ډېر شمېر افغان کډوالو ژوند له خطر سره مخ کوي.</p>

<p style="text-align: justify;">یاد سازمان زیاته کړې چې پاکستان د تېر کال له سپټمبر راهیسې د روان کال تر فبرورۍ میاشت پورې پنځه سوه او ۲۷ زره افغان کډوال ایستلي دي.</p>

<p style="text-align: justify;">یاد سازمان د خپل راپور په یوه برخه کې د پاکستان نوي حکومت ته د بشري حقونو په اړه سپارښتنې کړې او لیکلي یې دي چې د اسلام‌اباد پرېکړه د افغان کډوالو د ایستلو ترڅنګ د دغو کډوالو د ځورونې او تبعیض ډېرېدو لامل شوې ده.</p>

<p style="text-align: justify;">دغه راز، یاد سازمان ټینګار کړی چې افغان کډوال باید د بشري حقونو د قوانینو پر اساس خوندي پاتي شي.</p>

<p style="text-align: justify;">یاد سازمان له نړۍوالې ټولنې غوښتي چې پاکستان کې د میشت افغانانو د کډوالۍ دوسیو ته رسېدنه وکړي او د بیا میشتېدنې لړۍ چټکه کړي.</p>

<p style="text-align: justify;">دا په داسې حال کې ده چې د پاکستان حکومت په تازه‌ګۍ سره د دغه هېواد پولیسو ته امر کړی څو د افغان کډوالو د ایستلو دویمه لړۍ پيل کړي او ویل شوي چې په دې دور کې به یو میلیون افغان کډوال له پاکستانه وایستل شي.</p>

<p style="text-align: justify;">مخکې له دې په لومړۍ مرحله کې پاکستان د تېر کال په نومبر میاشت کې اعلان کړی و چې ۱،۷ میلیون افغان کډوال به چې د اوسېدنې اسناد نه لري، له دغه هېواد څخه وباسي.</p>