<p style="text-align: justify;">کابل (پژواک، ۲۷ وری ۱۴۰۳): د افغانستان مخکني لسمشر حامد کرزي او د تېر حکومت د ملي مصالحې د عالي شورا رییس عبدالله عبدالله پر ایران د اسرائیلو برید د ایران مشروع حق بللی دی.</p>
<p style="text-align: justify;">اسرائیلو د روانې وري میاشتې په ۱۴ مه په دمشق کې د ایران پر قونسلګرۍ هوايي برید وکړ. په دغه برید کې د سپاه پاسداران اوه غړي ووژل شول.</p>
<p style="text-align: justify;">د راپورونو له مخې، د دغه برید په ځواب کې ایران د تېرې شنبې په شپه پر اسرائیلو شاوخوا ۳۰۰ د بېپیلوټه الوتکو، کروز او بالسټیک توغنديو بریدونه وکړل.</p>
<p style="text-align: justify;">د افغانستان پخواني ولسمشر حامد کرزي پر خپله <strong><a href="https://twitter.com/KarzaiH">اېکسپاڼه</a> </strong>لیکلي چې په دې وروستیو کې د جګړو او کړکېچونو د زیاتوالي او د نړۍوالو قوانینو او اصولو د نقض له امله نړۍواله سوله له جدي ګواښ سره مخ شوې ده.</p>
<p style="text-align: justify;">هغه لیکلي: «په دمشق کې د ایران پر قونسلګرۍ د اسرائیلو برید یوه له نویو پېښو وه چې د ایران د مشروع دفاعي حق له مخې د ایران اسلامي جمهوریت له غبرګون سره مخ شوه، ایران د افغانستان یو ورور او ګاونډی هېواد دی چې په سختو شرایطو کې زموږ د خلکو ترڅنګ ولاړ و او افغانان هم د ایران له خلکو سره د خواخوږۍ او پیوستون احساس کوي.»</p>
<p style="text-align: justify;">کرزي زیاته کړه، په غزه کې جګړې هم تر ټولو ناوړه انساني ناورین رامنځته کړی چې باید ژر تر ژره د دایمي اوربند په رامنځته کولو او د یوه خپلواک دولت درلودو ته د فلسطین د خلکو په رسېدو سره پای ته ورسیږي څو هم کړکېچ کم شي او هم په فلسطین، اسرائیلو او ټوله سیمه کې د ملکي وګړو ژوند خوندي شي.</p>
<p style="text-align: justify;">د تېر حکومت د ملي مصالحې د عالي شورا رییس ډاکټر عبدالله عبدالله هم پر خپله <strong><a href="https://twitter.com/DrabdullahCE/status/1779501537116446764">اېکسپاڼه</a> </strong>لیکلي، اسرائیلو په سوریه کې د ایران پر قونسلګرۍ په برید سره د دولتونو ترمنځ قوانین، نړۍوال کنوانسیونونه، د ډیپلوماټیکو استازولیو خوندویتوب او نړۍوال عرف تر پښو لاندې کړل.</p>
<p style="text-align: justify;">هغه لیکلي چې اسرائیلو ته د ایران ځواب دفاعي اقدام او د ایران د ملي حاکمیت د نقض پر وړاندې غبرګون ګڼل کیږي.</p>
<p style="text-align: justify;">عبدالله زیاته کړې، د اسرائیلو له خوا په غزه کې په بېحمانه ډول د بېګناه فلسطینیانو د وژلو دوام او د ماشومانو، ښځو، د نړۍوالو موسسو د کارکوونکو، ډاکټرانو او مرستندویه کارکوونکو په نښه کول په سیمهییزه او نړۍواله کچه د ناورین اصلي لاملونه دي.</p>
<p style="text-align: justify;">هغه لیکلي: «ایران زموږ د دیني، تاریخي او فرهنګي مشترکات ګاونډی او دا مهال د میلیونونو افغانانو کوربه هېواد دی. د ایران پر وړاندې د اسرائیلو هر ډول اقدام او د کړکېچ زیاتېدل د افغانستان پر وضعیت مستقیم اغېز او د سیمې او نړۍوالې سولې او امنیت لپاره نا اټکل کېدونکې ناوړه پایلې لري، موږ له سولهییزې لارې د نړۍوالو او سیمهییزو ناورینونو د حل پلویان یو او له هر اقدامه چې د سولې، ثبات او د کړکېچ کمولو په موخه ترسره کېږي، ملاتړ کوو.»</p>
<p style="text-align: justify;">د افغانستان د بهرنیو چارو وزارت هم پر اسرائیلو د ایران برید مشروع دفاع بللې او د نړۍ او سیمې له اغېزناکو هېوادونو یې غوښتي څو د اسرائیلو د جنایتونو د مخنیوي لپاره خپلې هڅې ګړندۍ کړي.</p>
<p style="text-align: justify;">د حزب اسلامي ګوند مشر ګلبدین حکمتیار هم پرون پر اسرائیلو د ایران برید د ایران مشروع حق ګڼلې او ویلي یې و چې مسوولیت یې «د اسرائیلو شریرو او ملاتړو» زمامدرانو ته ورګرځي.</p>
