کابل کې د ۱۲ بهرنیو لوبغاړو په ګډون د «فوټبال اتلانو لیګ» درېیم پړاو سیالۍ پیل شوې

کابل (پژواک، د غويي لومړۍ نېټه ۱۴۰۳): د افغانستان بدني روزنې او سپورټ عمومي ریاست وايي چې نن په کابل کې د یو شمېر بهرنیو لوبغاړو په ګډون د فوټبال اتلانو لیګ درېیم پړاو یوه میاشتنۍ سیالۍ پیل شوې.

یاد ریاست پر خپلې اېکس‌پاڼې د یاد خبر خپرولو ترڅنګ د فوټبال فدراسیون فني مرستیال حافط احمدجان ځدراڼ له قوله لیکلي چې په یاد لیګ کې ۱۲ لوبډلې دي چې ځیني بهرني لوبغاړي یې هم ګډونوال دي.

د افغانستان د فوټبال فدراسیون ویاند مصطفی هاشمي ویلي چې له نایجریا، ایران او پاکستان څخه مطرح ۱۲ لوبغاړي په یاد لیګ کې لوبېدو لپاره کابل ته راغلي دي.

د افغانستان بدني روزنې او سپورټ عمومي ریاست مشر مولوي احمدالله وثیق د دغه لیګ په پرانیست‌غونډه کې ویلي چې اسلامي امارت د ورزش ملاتړ کوي او د لوبغاړو ترڅنګ ولاړ دی.

هغه وایي: «همدا وجه ده چې په دې وروستیو کې افغان ورزشکارانو له بهرنیو سیالیو د پخوا په پرتله ښې لاسته‌راوړنې درلودلې دي.»

د ده په وینا، د افغانستان اتلانو لیګ کې هره لوبډله ۱۱ لوبې کوي او په ټوله کې ۶۶ لوبې پلان شوې دي.

د فوټبال فدراسیون وایي، دا ځل نندارچیان په وړیا توګه کولی شي لوبې له نږدې وګوري.

دی زیاتوي چې دا لوبې افغانستان کې له یوه خصوصي ټلویزیون (آریانا) څخه په ژوندۍ بڼه هم خپرېږي.

د یادونې ده، وړم کال د دغه لیګ اتلولي د هرات «سرخ پوشان»  تېر کال د هرات «اټک انرژي» لوبډلو ګټلې وه.