زارشریف (پژواک، ۲ غویی ۱۴۰۳): د بلخ عامې روغتیا ریاست وایي، په ۱۴۰۲ کال پر سرطان اخته ۴۹۱۲ ناروغانو د مزارشریف ملکي روغتون ته مراجعه کړې چې د ۱۴۰۱ کال په پرتله نږدې دوه برابره ډېروالی ښيي.
د مزارشریف ابو علي سینا بلخي حوزوي روغتون د انکالوژۍ برخې شیف سرویس احسانالله کلیوال وایي چې دغه ناروغي د ډېرېدو په حال کې ده او یوازې تېره یوه میاشت کې پر سرطان ناروغۍ اخته ۴۳۲ ناروغانو دغه روغتون ته مراجعه کړې ده.
هغه زیاتوي چې تېر ۱۴۰۲ کال روغتون ته پر سرطان اخته ۴۹۱۲ ناروغانو مراجعه کړې چې دغه شمېر په ۱۴۰۱ کې یوازې ۲۶۱۳ کسانو ته رسېده.
کلیوال وایي، د سرطان ناروغانو د شمېر ډېرېدو یو لامل دا دی چې پخوا په دغه روغتون کې د یادې ناروغۍ تشخیص نه کېده او اوس د تشخیص ترڅنګ د جنګ او جګړې نشتون د دې لامل شوی چې ګڼ شمېر خلک روغتون ته مراجعه وکړي.
بل لور ته یو شمېر ډاکټران د دې ناروغۍ د مخنیوي په موخه خلکو ته عامه پوهای مهم ګڼي.
د مزارشریف ابو علي سینا بلخي حوزوي روغتون د انکالوژۍ برخې ډاکټر تورج اربابي وایي، د دې ناروغۍ د مخنیوي او وقایې لپاره اړتیا دا ده چې خلکو ته پوهای ورکړل شي.
نوموړی زیاتوي چې د دې ناروغۍ لومړي پړاو کې باید ناروغ ډاکټر ته مراجعه وکړي تڅو بدن کې یې له خپریدو مخنیوي او هم یې درملنه وشي.
هغه دغه راز د خوړو ناسم رژیم د دې ناروغۍ د رامنځته کېدو لوی لامل بولي او زیاتوي چې شمال کې ډېری خلک له وچې غوښې استفاده کوي او له امله یې هم ډېر خلک د معدې پر سرطان اخته کېږي.
په ورته وخت کې یو شمېر ناروغان او ناروغلرونکي دوی ته له ترسره کېدونکو خدمتونو خوښ دي.
۳۸ کلن محمدناصر چې له تېر یو نیم کال راهیسې پر سرطان ناروغۍ اخته شوی، وایي چې د درمنلې لومړي پړاونه یې د کابل په جمهوریت روغتون کې پیل کړي وو او له تېر یوه کال راهیسې د مزارشریف ابو علي سینا بلخي حوزوي روغتون ته د درملنې په موخه راځي.
هغه په دغه روغتون کې له شته خدمتونو خوښ دی او زیاتوي چې له تېر یو کال راهیسې په دغه روغتون کې په وړیا توګه واکسین ترلاسه کوي.
نعمتالله یو ناروغ لرونکی هم وایي چې پلار یې له تېرو شپږو میاشتو راهیسې د معدې پر سرطان اخته شوی او نن یې د درېیم ځل لپاره ورته په دغه روغتون کې واکسین تطبیق کړی دی.
نوموړی دغه راز زیاتوي چې د تېرو میاشتو په پرتله یې د پلار روغتیایي وضعیت کې د پام وړ ښهوالی راغلی دی.
بلخوا د بلخ عامې روغتیا ریاست مسوولین هم ټولو ناروغانو او ناروغلرونکو ته ډاډ ورکوي چې شته امکانات به له دوی ونه سپموي.
د بلخ عامې روغتیا ریاست مرستیال شیخمېر صدام وایي چې د سرطاني ناروغانو لپاره د مزارشریف ابو علي سینا بلخي حوزوي روغتون کې شپه او ورځ خدمات وړاندې کېږي.
هغه زیاتوي چې یادو ناروغانو ته د بستر او واکسین د تطبیق سربېره د اړتیا پر مهال په وړیا توګه وینه هم ورکول کېږي.
سرطان یوه لاعلاجه ناروغي ده چې تر ډېره په ډېر عمر لرونکو کسانو کې رامنځته کېږي او د مړینې لامل کېږي.
GET IN TOUCH
NEWSLETTER
SUGGEST A STORY
PAJHWOK MOBILE APP