<p style="text-align: justify;">کابل (پژواک، ۴ غویی ۱۴۰۳): له څو میاشتو بحث وروسته د بریتانیا پارلمان رواندا ته افغان پناهغوښتونکو په ګډون د ناقانونه کډوالو د ایستلو طرحه تصویب کړه.</p>
<p style="text-align: justify;">اسوشیتدپرس راپور ورکړی چې د بریټانیا پارلمان پرون (دوشنبه) د دغه هېواد د لومړي وزیر ریشی سوناک پیشنهادي طرحه تصویب کړه چې له مخې به یې هغه ناقانونه کډوال چې په قاچاقي ډول د وړو کښتیو له لارې دغه هېواد ته راغلي، رواندا ته لېږل کېږي.</p>
<p style="text-align: justify;">د یادې طرحې له مخې، د بریټانیا دولت د یوه پنځه کلن پلان له مخې به هغه کډوال چې دغه هېواد ته راځي، رواندا ته ولېږي څو له هغه ځایه یې د پناهغوښتنې وړاندیز پرمخ لاړ شي.</p>
<p style="text-align: justify;">دا په داسې حال کې ده چې ګاردین راپور ورکړی و چې د بریټانیا لومړی وزیر د دغه هېواد د دوو حزبونو (محافظهکار او اپوزیسیون) تر فشار لاندې دی څو د ناقانونه کډوالو د اخراج طرحه تایید نه کړي.</p>
<p style="text-align: justify;">یادې طرحې رواندا هېواد د درېیم امن هېواد په توګه اعلان کړی و او بریتانیايي چارواکو ته اجازه ورکوي څو هغه کډوال چې په ناقانوني توګه دغه هېواد ته راځي، د پناهغوښتنې د پروسې له څېړلو پرته رواندا ته ولېږل شي.</p>
<p style="text-align: justify;">ویل شوې چې یاده طرحه د روان کال په جولای میاشت کې پلې کېږي.</p>
