<p style="text-align: justify;">غزني ښار (پژواک، ۱۰ غويی ۱۴۰۳): په غزني ولایت کې د دوو کورنیو ترمنځ ۱۲ کلنه دښمني د حکومتي مسوولینو، دیني عالمانو او قومي مشرانو په منځګړیتوب پای ته ورسېده.</p>
<p style="text-align: justify;">د اړوندې موضوع په اړه د غزني والي حافظ امین جان عمري پژواک ته وويل چې د خواجه عمري ولسوالۍ اړوند قلعه نو کلي کې د دوو کورنيو ترمنځ د قتل د موضوع پر سره رامنځته شوې دوولس کلنه دښمني د حکومتي مسوولینو او قومي مشرانو په منځګړیتوب حل شوه.</p>
<p style="text-align: justify;">نوموړي وویل: «۱۲ کاله وړاندې د عبدالبصیر او زلمي د کورنیو ترمنځ د ځمکې پر سر شخړه شوې وه چې د زلمي زوی په کې قتل شوی و او له هغه وروسته دواړو خواوو یو او بل ته لارې نیولې خو اوس يې مشکل حل شو.»</p>
<p style="text-align: justify;">هغه زیاته کړه، شخړې او کليوالي ناندرۍ خلک بد مرغه کوي، ژوند يې له ګواښ سره مخ کوي او په ټولنه کې ستونزي رامنځته کوي.</p>
<p style="text-align: justify;">هغه پر خلکو غږ وکړ چې په ټولنه کې دې ټولې ستونزې د خبرو اترو له لارې حل کړي.</p>
<p style="text-align: justify;">نوموړي دغه راز وویل چې د دغه ولایت په یو شمېر نورو ولسوالیو کې هم دې ته ورته لويې او وړې شخړې شته چې د حل لپاره يې هلې ځلې روانې دي.</p>
<p style="text-align: justify;">د خواجه عمري ولسوالۍ یوه قومي مشر او د یادې جرګې غړي مجمر پژواک ته وویل، له کلونو راهیسې د یادو کورنیو ترمنځ ستونزې وي خو اوس یې مشکل حل شو.</p>
<p style="text-align: justify;">نوموړي وویل: «له دې وروسته به دواړه خواوې د سولې او ورورګلوۍ تر سيورې لاندې ژوند کوي او په ښو چارو کې به يو بل ته لاس ورکوي.»</p>
<p style="text-align: justify;">په غزني کې یوه مدني فعال شېراحمد سهیم وویل، دا ډول روغې جوړې کولای شي چې خلک سره یو کړي او ولسوالیو او کلیو کې پرمختګ رامنځته شي.</p>
<p style="text-align: justify;">نوموړي له یادو سمیهییزو مسولینو او قومي مشرانو مننه وکړه چې د دې شخړې د حل لپاره يې نه ستړې کېدونکې هلې ځلې کړې دي.</p>
<p style="text-align: justify;">هغه د هېواد د نورو سیمو پر حکومتي مسولینو، علماوو او قومي مشرانو هم غږ وکړ چې په خپلو ولایتونو، ولسوالیو او کلیو کې د قومونو او کورنیو ترمنځ ستونزې او بدې هوارې کړي.</p>
<p style="text-align: justify;">د یادوني ده چې له دې مخکې هم د غزني ولایت په قره باغ، جاغوري، ناور، ګیلان، اجرستان او ناوې ولسوالیو کې د قومونو او کورنیو ترمنځ یو شمېر ستونزې او دښمنۍ د سیمهییزو مسؤولینو، علماو او قومي مشرانو په منځګړیتوب هوارې شوې دي.</p>
