اروزګان کې د روغتیایي کارکوونکو تحصیلي اسناد ارزول کېږي

ترینکوټ (پژواک، ۱۷غویی ۱۴۰۳): اروزګان کې د دولتي او خصوصي روغتیايي کارکوونکو د تحصیلي اسنادو ارزولو په موخه کمېټه جوړه شوې چې جعلي اسناد لرونکي کسان به پیدا او عدلي ارګانونو ته ور وپېژندل شي.

د اروزګان والي د دفتر رییس مولوي هارون حقاني پژواک خبري اژانس ته وویل، یوې ګډې کمېټې دغه ولایت کې ټولو خصوصي او دولتي روغتونونو، شخصي کتنځایونو او درملتونونو کې د روغتیایي کارکوونکو د اسنادو او فعالیت ارزونه پیل کړې ده.

هغه وویل، د دغه ولایت د والي په لارښوونه په تازه جوړه شوې ګډه کمېټه کې د ولایت د استازو ترڅنګ د حکمونو او فرمانونو د تعقیب او عامي روغتیا ریاستونو، د علماوو شورا او د خوړو او درملو ادارې استازي هم غړیتوب لري.

نوموړي زیاته کړه، یاده کمېټه به د روغتیايي کارکوونکو تحصیلي اسناد او د فعالیت جوازونه ارزوي او په پایله کې به یې یوازې هغو کسانو ته د فعالیت اجازه ورکوي چې چارې یې له قانون سره سمې روانې وي.

هغه وویل، هغه کسان به محکمې ته ور وپېژندل شي چې د فعالیت له جواز، تحصیلي اسنادو او زده‌کړو پرته یې کار پیل کړی وي.

د نوموړي په خبره، یاده پروسه یې د خلکو په غوښتنه پیل کړې چې د مرکز په ګډون به یې ټولو ولسوالیو ته وغځوي.

ورته مهال د دغه ولایت اوسېدونکي خوښ دي چې د روغتیایي کارکوونکو د اسنادو ارزولو په موخه کمېټه جوړه شوې او ارزونه یې کېږي.

د ترینکوټ ښار اوسېدونکی فضل‌الرحمن وايي، یو شمېر کسان شته چې له اسنادو پرته فعالیت کوي او زیاتوي چې تازه جوړه شوې کمېټه دې غیرمسلکي او په جعلي اسنادو فعالیت لرونکو کسانو سره قانوني چلند وکړي.