<p style="text-align: justify;">فراه (پژواک، ۳۰ غویی ۱۴۰۳): سیمهییز چارواکي وایي، د فراه په مرکز او خاکسفید ولسوالۍ کې د توپان او تندر لوېدو له امله یو کس مړ او شپږ نور ټپیان شوي دي.</p>
<p style="text-align: justify;">د فراه ولایت د طبیعي پیښو پر وړاندي د مبارزې او چمتوالې رئیس مولوی محمداسراییل سیار وایې چې په دغه ولایت کې د تېرې شپې د تېر توپان له امله لسګونه سولر ښیښې ماتې شوي دي.</p>
<p style="text-align: justify;">هغه زیاته کړه چې د دغه ولایت په مرکز کې د تیز توپان له امله یوه دېوال چپه شوی چې له امله یې څلور کسان ټپيان شوي دي.</p>
<p style="text-align: justify;">ده همدا راز وویل چې د دغه ولایت په خاکسفید ولسوالۍ کې د تندر لوېدو له امله یوه کس خپل ژوند له لاسه ورکړی او دوه ماشومان ټپیان شوي دي.</p>
<p style="text-align: justify;">سیار د جزییاتو له ورکولو پرته وویل چې دغو توپانونو د یاد ولایت په مرکز او ولسوالیو کې خلکو ته درانه مالي زیانونه اړولي دي.</p>
