کابل (پژواک، ۴ غبرګولی ۱۴۰۳): د افغانستان د بهرنیو چارو وزارت د ناروې، ایرلنډ او اسپانیا هېوادونو له لوري د فلسطین د رسمیت پېژندنې په اړه پرېکړه مثبت ګام بللی دی.
د افغانستان بهرنیو چارو وزارت نن (جمعه، د غبرګولي ۴مه) د یوې خبرپاڼې په خپرولو سره له دې پرېکړې هرکلی کړی دی.
دغه وزارت زیاته کړې: «دغه پرمختګ په داسې حال کې کېږي چې صهیونیستي اشغال د فلسطین پر تاریخي خاوره د تیری کولو سربېره، په غزه کې د فلسطین ملت د نسلوژنې د جنګي جنایت په ترسره کولو سره د جمعیتي بدلون هڅه کوي.»
دغه وزارت لیکلي چې د فلسطین خاوره د دغه هېواد د خلکو مشروع حق دی.
سرچينې څرګنده کړې: «د افغانستان اسلامي امارت يو ځل بيا له نړۍوالې ټولنې، په ځانګړې توګه له اسلامي هېوادونو غواړي چې د خپل مسووليت او د فلسطين ملت د ازادۍ او دفاع د حق له مخې د اوسني ناورین پر وړاندې بېړني اقدامات وکړي.»
دا په داسې حال کې ده چې پرون (چهارشنبې، د غبرګولي ۳مه) د ناروې دولت اعلان وکړ چې دغه هېواد غواړي فلسطین د یوه خپلواک هېواد په توګه په رسمیت وپېژني؛ له دې سره هممهاله رسنیو راپور ورکړ چې ایرلنډ او اسپانیا به هم ډېر ژر فلسطین په رسمیت وپېژني.
له دې مخکې قطر او ترکیې د اسلامي همکاریو سازمان هم د ناروې، ایرلنډ او اسپانیا د دې پرېکړې هرکلی کړی و.
