د ا.ا مشر: له نړۍ سره د اړیکو برخه کې مو خپل مکلفیت ادا کړی

کابل (پژواک، ۲۵ غبرګولی ۱۴۰۳): د اسلامي امارت مشر په اختريز پيغام کې د ټولو حقونو ته پر ژمنیا او د پرمختګونو لپاره پر یوالي ټینګار کړی، له پانګوالو يې هېواد کې د پانګونې غوښتنه کړې، وايي ا.ا له نړۍ سره د شریعت په چوکاټ کې اړيکې غواړي.

د اسلامي امارت د مشر ملا هبت‌الله اخندزاده په پيغام کې چې نن خپورشوی، راغلي: «د اسلامي امارت په راتلو سره په ټول افغانستان کې شرعي نظام حاکم شوی، مقدس اسلامي شریعت تطبیق دی، د دیني شعائرو د لوړتیا او دیني مراکزو پراختیا او تقویې لپاره مهم اقدامات شوي، دا ټول هغه اهداف او ارزښتونه دي چې د ترلاسه کولو لپاره یې زموږ ایماندارو خلکو اوږدې مبارزې کړې او لویې قربانۍ یې ورکړې دي.»

دغه اختریز پیغام چې لږ تر لږه پر اوو ژبو باندې لیکل شوی، په کې ویل شوي چې په هېواد کې اسلامي ورورولي او یووالی ټینګ شوي، عامه شتمنۍ لکه کانونه، ځمکې، ځنګلونه او نور ملکیتونه د بیت‌المال په حیث خوندي دي.

په پیغام کې راغلي: «د اسلامي امارت حاکمیت سره د ټولو اتباعو شرعي حقوق تأمین او محفوظ دي، هيڅوک پر چا ظلم او تېری نشي کولای، د ظلم مخه نیول کېږي او د مظلوم د حق پوښتنه کېږي. د شرعي محاکمو په فعالیت سره سپیڅلی شریعت پلی شوی، دغه راز د امربالمعروف او نهې عن المنکر لویه فریضه عملاً ترسره کېږي. په دې برخه کي د شرعي اصولو سره سم د ټولنې د اصلاح په مقصد اقدامات ترسره کېږي.»

د اسلامي امارت مشر ویلي، د الله جل جلاله په نصرت او فضل سره د اسلامي امارت د حکیمانه اقداماتو، اخلاص او شفافیت په برکت د بیارغونې، کرنې، اوبو لګولو، سرک جوړولو، کانونو استخراج او نورو برخو کې مهم ګامونه اخیستل شوي او لا تر لاس لاندې دي.

پیغام راغلي چې اسلامي امارت په اقتصادي برخه کې د لا نور پرمختګ او د خپلو خلکو د اقتصادي ستونزو د له منځه وړلو په مقصد پر ټولو سرمایه‌دارانو او سوداګرو یو ځل بیا هم غږ کوي چې په بېلابېلو برخو کې سرمایه‌ګذارۍ وکړي او د افغانستان پرمختګ او ترقۍ برخه کې خپل مسئوولیت اداء کړي.

همداراز ویل شوي چې اسلامي امارت د دوی امنیت او د ټولو حقوقو رعایت ته ژمن دی او ټولې امارتي ادارې مکلفیت لري چې د افغانستان د ښېرازۍ او اقتصادي پرمختګ برخه کې پانګوالو ته لازمې اسانتیاوې رامنځته کړي او په دې برخه کې د هغوی غوښتنو ته رسېدنه وکړي.

د پیغام په بله برخه کې له نړۍ سره اړیکو ته اشاره شوې او ویل شوي چې اسلامي امارت له ټولې نړۍ، په ځانګړې توګه له اسلامي ملکونو سره د شریعت په چوکاټ کي سياسي او اقتصادي اړیکې غواړي، او په دې برخه کې يې خپل مکلفیت ادا کړی دی.

یاد پیغام کې د اسلامي امارت مسئوولینو ته سپارښتنه شوې چې په ټولو برخو کې د خلکو د خدمت، امنیت او هوساینې لپاره خپل مکلفیتونه په جدیت سره سرته ورسوي. خپلې دروازې د ولس پر مخ پرانیزي، کارونه یې په احسنه او عاجله طریقه اجراء کړي، له خلکو سره هیڅکله داسې چلند ونه کړي، چې خلک ځانونه له حکومته پردي وبولي.

همداراز امنیتي مسؤلینو ته هدایت شوی چې په ځانګړي ډول د اختر په ورځو کې د خپلو خلکو هوساینې، خدمت او خوندیتوب ته پوره پاملرنه وکړي، د خوشحالۍ او ارامۍ لپاره ټول لازم اقدامات ترسره کړي، د شهیدانو، معلولينو او يتیمانو د کورنیو پوښتنه وکړي او د خپل توان په اندازه ورسره کمک وکړي.

دغه پیغام کې د اسرائيلي ځواکونو له لوري په غزه کې د بې‌‌ګناه انسانانو وژنو ته هم اشاره شوې، د اسلامي امارت مشر ویلي: «د فلسطين په غزه او نورو سیمو کې پر مېرمنو، ماشومانو او مظلومو مسلمانانو د اسرائیلي صهونیستانو بریدونه او ظلمونه یو ځل بیا په سختو الفاظو بد بولو(غندو) او له نورو ملکونو هم غواړو چې د دغه ستر جنايت او وحشي مظالمو د مخنيوي په برابر په سمه توګه خپل مکلفيت ادا کړي.»

د ا.ا مشر د لوی اختر په دغه پیغام کې له یتیمانو، کونډو، معلولینو، مسکینانو، سېلاب‌ځپلو او له ګاونډيو هېوادونو له جبري راستنو شوو کډوالو سره پر مرسته کولو ټینګار کړی او همداراز یې ویلي د سوالګرو له سوال څخه د راګرځولو برخه کې د پام وړ اقدامات شوي؛ له زرګونو سوالګرو سره چې اړمن تثبیت شوي، د اسلامي امارت له خوا مرستې کېږي.