جلالي: سرګردانه ډله نه پوهېږي چې نور د سیاست بازار کې هيڅ خریدار نه لري

<p style="text-align: justify;">کابل (پژواک، ۵ چنګاښ ۱۴۰۳): په اتریش کې د ویانا د درې ورځنۍ ناستې له ترسره کېدو سره هم‌مهاله، د افغانستان بهرنیو چارو وزارت د درېیم سیاسي ریاست رییس ویلي، هغه کسان چې خپله طرحه او ولسي ملاتړ او له نړۍوال سیاسته درک نه‌لري او بیا هم د بهرني ملاتړ په تمه وي، هغوی پر ماتې محکوم دي.</p>

<p style="text-align: justify;">پرون د ویانا درې ورځنۍ ناسته په اتریش کې پیل شوه او یو شمېر ګډونوالو یې په افغانستان کې د افغانانو پر اراده د ولاړ حکومت رامنځته کېدو او پر بین‌الافغاني خبرو اترو ټینګار وکړ.</p>

<p style="text-align: justify;">په دې غونډه کې د اسلامي امارت ځینو مخالفو شخصیتونو چې د تېر حکومت له پرځېدو وروسته بهر ته تللي، ګډون کړی و.</p>

<p style="text-align: justify;">د افغانستان بهرنیو چارو وزارت د درېیم سیاسي ریاست رییس ذاکر جلالي د ویانا ناستې له نوم اخیستو پرته پر خپله اېکس‌پاڼه لیکلي، هغوی چې نه طرحه لري، نه ولسي ملاتړ لري او نه هم له نړۍوال سیاسته درک لري او بیا هم د بهرني ملاتړ په تمه وي، پر شکست محکوم دي.</p>

<p style="text-align: justify;">هغه لیکلي: «یاده سرګردانه ډله نه پوهېږي چې نور د سیاست بازار کې هيڅ خریدار نه لري او هيڅوک چمتو نه دی چې د سوځېدلو دانو په لوېدلو خبرو حساب پرانیزي.»</p>

<p style="text-align: justify;">دغه ناسته په داسې حال کې ترسره کېږي چې ټاکل شوې تر راتلونکې یوې اونۍ د دوحې درېیمه ناسته د اسلامي امارت، ملګرو ملتونو او ځینو نورو هېوادونو په ګډون په قطر کې ترسره شي.</p>

<p style="text-align: justify;">اسلامي امارت تر اوسه د ویانا ناستې په تړاو څه نه دي ویلي، خو ذبیح‌الله مجاهد تېر کال د دې ډول ناستې په اړه ویلي وو چې افغانان د غونډې ګډونوال پېژني او دوی هغه کسان دي چې یو ځل ازمویل شوي دي.</p>