<p style="text-align: justify;">کابل (پژواک، ۱۴ چنګاښ ۱۴۰۳): د افغانستان د کډوالو او راستنېدونکو چارو وزارت له یوې موسسې سره د دوه میلیون او ۷۱۰ زره امریکايي ډالرو په ارزښت د همکاریو د دوو هوکړهلیکونو له لاسلیکولو خبر ورکوي.</p>
<p style="text-align: justify;">د کډوالو او راستنېدونکو چارو وزارت نن پر <strong><a href="https://morr.gov.af/dr/%D8%A8%D9%87-%D8%A7%D8%B1%D8%B2%D8%B4-%D8%A8%DB%8C%D8%B4-%D8%A7%D8%B2-%D8%AF%D9%88-%D9%85%DB%8C%D9%84%DB%8C%D9%88%D9%86-%D8%AF%D8%A7%D9%84%D8%B1-%D8%AF%D9%88-%D8%AA%D9%81%D8%A7%D9%87%D9%85%E2%80%8C%D9%86%D8%A7%D9%85%D9%87-%D9%87%D9%85%DA%A9%D8%A7%D8%B1%DB%8C-%D8%AF%D8%B1-%D9%88%D8%B2%D8%A7%D8%B1%D8%AA-%D8%A7%D9%85%D9%88%D8%B1-%D9%85%D9%87%D8%A7%D8%AC%D8%B1%DB%8C%D9%86-%D8%A8%D9%87-%D8%A7%D9%85%D8%B6%D8%A7-%D8%B1%D8%B3%DB%8C%D8%AF">اېکسپاڼه</a> </strong>لیکلي چې دغه هوکړهلیکونه د افغانستان له ودان موسسې سره لاسلیک شوي دي.</p>
<p style="text-align: justify;">سرچینې لیکلي چې یاد هوکړهلیکونه د کډوالو وزارت د مسلکي مرستیال مولوي عبدالرحمن راشد او ودان موسسې د استازې ترمنځ لاسلیک شول چې ارزښت یې دوه میلیون ۷۱۰ زره او ۱۴۱ امریکايي ډالر دی.</p>
<p style="text-align: justify;">د دغو هوکړهلیکونو پر بنسټ، یاده موسسه به دغه اندازه پیسې د نغدي مرستو د وېش، د نابینایانو لپاره د حرفې زدهکولو زمینې برابرولو، رواني درملنې او په ننګرهار کونړ، لغمان، نورستان، کندهار، هلمند، اروزګان، زابل او نیمروز ولایتونو د تورخم له لارې راستنېدونکو د څارنې او سروې برخو کې ولګوي چې له مخې به یې ۱۲۴ زره او ۱۴۰ کسان ترې برخمن شي.</p>
<p style="text-align: justify;">د کډوالو او راستنېدونکو چارو وزارت د سږ کال د غبرګولي په ۲۴مه هم له موسسو سره د څلور میلیون او ۳۵۰ زره او ۱۶۹ امریکايي ډالرو په ارزښت اته هوکړهلیکونو لاسلیک کړي وو.</p>
