<p style="text-align: justify;">هرات (پژواک، ۲۹ چنګاښ ۱۴۰۳): هرات کې ځایي مسوولین وایي چې د هرات ښار له بېلابېلو ناحیو راټول شوي لسګونه ټنه تاریختېر او بېکیفیته درمل او خوراکي توکي وسوځول شول.</p>
<p style="text-align: justify;">د هرات د خوړو او درملو ادارې د خوراکي توکو ساتنې امر صبوراحمد خالقي وویل، د تېرو درېیو میاشتو په ترڅ کې د هرات ښار د ناحیو له پلورنځیو او درملتونونو ۶۰ ټنه تاریختېر او بېکیفیته درمل او خوراکي توکي راټول شوي وو چې تېر مازدیګر وسوځول شول.</p>
<p style="text-align: justify;">هغه زیاته کړه چې یاد توکي شاوخوا ۳۴۰۰ قلمه وو او ۳۵ میلیون افغانۍ ارزښت یې درلود.</p>
<p style="text-align: justify;">بلخوا، د هرات روغتیایي مسوولین وایي چې له تاریختېرو او بېکیفیته توکو استفاده د بېلابېلو ناروغیو لامل کېږي، له همدې امله له خلکو غواړي چې د خوړو او درملو تاریخ ته پاملرنه وکړي.</p>
<p style="text-align: justify;">د یادونې ده، د هرات د خوړو او درملو ادارې درې میاشتې مخکې هم شاوخوا ۶۵ ټنه تاریختېر درمل او بېکیفیته خوراکي توکي سوځولي وو.</p>
