متقي د حماس غورځنګ د سياسي دفتر له مشر سره ټيلیفوني خبرې کړې دي

کابل (پژواک، ۳ زمری ۱۴۰۳): د افغانستان د بهرنیو چارو وزارت سرپرست د حماس غورځنګ د سياسي دفتر له مشر سره ټيلیفوني خبرو کې د ا.ا او افغان ملت له لوري د فلسطين ملت د مقاومت او برحقه داعیې پر ملاتړ ټینګار وکړ.

د بهرنیو چارو وزارت له لوري نن په خپره شوې خبرپاڼه کې راغلي چې د یاد وزارت سرپرست مولوي اميرخان متقي او د حماس جهادي غورځنګ د سياسي دفتر له مشر اسماعيل هنيه سره ټيلیفوني خبرې وکړې.

په دې ټيلیفوني اړيکه کې په غزه کې د وروستيو سياسي او جهادي انکشافاتو او سيمه‌ييزو مسايلو په اړه هراړخيزې خبرې اترې وشوې.

متقي د حماس جهادي غورځنګ د مبارزې او سرښندنو ستاينه وکړه او په جهادي مبارزه کې یې پر اتفاق او استقامت ټينګار وکړ او اسلامي اصولو او ارزښتونو ته يې ژمنتيا، اصل وباله.

همداراز متقي د چین په بیجینګ کې د فلسطيني ډلو ترمنځ د خبرو اترو او اتفاق هرکلی وکړ.

د بهرنیو چارو وزارت سرپرست دغه راز اسماعيل هنيه ته د اسلامي امارت او ملت له لوري د فلسطيني ملت د مقاومت او برحقه داعیې پر ملاتړ یو ځل بیا ټینګار وکړ.

د خبرپاڼې د معلوماتو له مخې، هنیه دغه راز د فلسطين په تړاو او په ځانګړې توګه په غزه کې د وروستيو پېښو په اړه د اسلامي امارت او افغان ملت دریځ وستایه او له «اشغالګر رژیم» سره یې د وروستیو مذاکراتو په اړه معلومات شریک کړل.