راتلونکې شنبې یو شمېر ولایتونو کې د ګوزڼ واکسین کمپاین پیلېږي

<p style="text-align: justify;">کابل (پژواک، ۱۸ زمری ۱۴۰۳): له پولیو د پاک افغانستان په نوم یوه بنسټ ویلي چې ټاکل شوې د راتلونکې شنبې ورځ په یو شمېر ولایتونو کې د ګوزڼ واکسین د تطبیق کمپاین پیل شي.</p>

<p style="text-align: justify;">دغه بنسټ نن پر خپله اېکس‌پاڼه د ګوزڼ واکسین د تطبیق نوي کمپاین له پیلېدو خبر ورکړی دی.</p>

<p style="text-align: justify;">د یادونې ده، دا په افغانستان کې د ګوزڼ ضد واکسین تطبیقولو پنځم پړاو دی چې د روان زېږدیز کال له پیله تر اوسه ترسره کېږي.</p>

<p style="text-align: justify;">شاوخوا یوه میاشت مخکې دغه بنسټ په ځینو ولایتونو کې د پولیو واکسین تطبیق کړی و.</p>

<p style="text-align: justify;">د عامې روغتیا وزارت د ګوزڼ د له منځه وړو عملیاتي مرکز له خوا وړاندې شمېرو له مخې، د روان زېږدیز کال له پیله تر اوسه په هلمند، نورستان، کونړ او کندهار کې د پولیو ۱۱ پېښې ثبت شوې دي.</p>

<p style="text-align: justify;">د ماشومانو فلج یا ګوزڼ یوه ویروسي او ساري ناروغي ده چې کولی شي له پنځه کلنۍ کم‌عمره ماشومان پر دایمي جسمي ناتواني اخته کړي او ان د مړینې لامل یې شي.</p>

<p style="text-align: justify;">افغانستان او پاکستان یوازې هغه دوه هېوادونه دي چې په کې د ماشومانو فلج ناروغي په بشپړ ډول له منځه نه ده تللې.</p>

<p style="text-align: justify;"></p>