د هېواد د خپلواکۍ کالیزه؛ کرزي او عبدالله پر ملي یووالي او تفاهم ټینګار وکړ

کابل (پژواک، ۲۸ زمری ۱۴۰۳): حامد کرزی او ډاکټر عبدالله عبدالله د هېواد د خپلواکۍ بېرته اخیستو د ۱۰۵مې کالیزې په مناسبت په جلا جلا پیغامونو کې ملي یووالی او تفاهم اړین بللي او هیله یې څرګنده کړې چې د دغې ورځې نمانځنه د افغانانو ترمنځ د اتحاد، پیوستون او ټولنیز عدالت د تامین زمینه برابره کړي.

نن د یک شنبې ورځ د زمري ۲۸مه، د اګست ۱۸مه د هېواد ۱۰۵ مې کالیزې سره برابره ده.

د هېواد پخواني ولسمشر حامد کرزي په یوه پیغام کې دغه ورځ تاریخي بللې او د هېواد د ویاړونو پر ساتنه یې ټینګار کړی دی.

هغه په دغه پیغام کې ملي یووالی او تفاهم اړین ګڼلی او هیله یې څرګنده کړې چې باید د هېواد هر وګړی خپل هېواد کې د خوندیتوب احساس وکړي څو د هېواد په ابادولو کې برخه واخلي.

کرزي دغه‌راز ویلي، د افغانستان روښانه راتلونکی د ځوان نسل روزنې پورې اړه لري او یو ځل بیا یې له سرپرست حکومته غوښتي چې ژر تر ژره د نجونو پر مخ د ښوونځیو او پوهنتونونو دروازې پرانیزي.

ورته مهال، په تېر حکومت کې د ملي روغې جوړې عالي شورا رییس ډاکټر عبدالله عبدالله هم په یوه پیغام کې د هېواد د خپلواکۍ بېرته اخیستو د ۱۰۵مې کالیزې له امله مبارکي ویلې ده.

هغه ویلي چې د افغانستان ازادي غوښتونکو او مبارزو خلکو د امان‌الله خان او نورو ازادي غوښتونکو مشرانو په رهبرۍ د وخت بریتانیا امپراتورۍ د مداخلې او یرغل پروړاندې پاڅون وکړ څو د هېواد خپلواکي ترلاسه کړي.

عبدالله زیاته کړې: «د افغانستان ازادي او خپلواکي زموږ د هېواد د ویاړلو او سرلوړو نیاکانو د قربانیو او سرښندنو لاس ته راوړنه ده. هیله لرو چې د دې ملي ورځې نمانځنه د افغانستان د خلکو ترمنځ د اتحاد، یووالي او ټولنیز عدالت د تامین زمنیه برابره کړي.»

نن یکشنبه (د زمري ۲۸مه) له انګرېزانو څخه د هېواد د خپلواکۍ بېرته اخیستو له ورځې سره برابره ده، په دغه ورځ امان‌الله خان د افغانستان خپلواکي رسما اعلان کړه.