<p style="text-align: justify;">کابل (پژواک، ۲۹ زمری ۱۴۰۳): د راپورونو له مخې، په پاکستان کې د یوې ترافیکي پېښې له امله اته کسان مړه او اووه نور ټپيان شوي دي.</p>
<p style="text-align: justify;">پاکستاني رسنیو <strong><a href="https://www.thenews.com.pk/latest/1221562-ghotki-bus-accident-claims-eight-lives">راپور</a></strong> ورکړی چې دغه پېښه نن سهار (دوشنبې) د سوکور – ملتان پر لویه لار د ملکولي کلي اړوند د یوه مسافر وړونکي او ټرېلر موټر ترمنځ د ټکر له امله رامنځته شوې ده.</p>
<p style="text-align: justify;">پولیسو ویلي چې مسافر وړونکی موټر له منسهره څخه د کراچۍ پر لور روان و.</p>
<p style="text-align: justify;">پولیسو زیاته کړې، د څلورو ټپیانو روغتیايي وضعیت د اندېښنې وړ دی او په مړو کې ماشومان او ښځې هم شامل دي.</p>
<p style="text-align: justify;">درې میاشتې مخکې هم د پاکستان په پنجاب ایالت کې د یوې ترافیکي پېښې له امله د ۹ ماشومانو په ګډون د یوې کورنۍ ۱۴ غړي مړه او ۱۲ نور کسان ټپیان شوي وو.</p>
