ازبکستان په بلخ کې د یوې لویې دیني مدرسې جوړولو چارې پيل کړې

مزارشریف (پژواک، ۳۰ زمری ۱۴۰۳): د بلخ مرکز مزارشریف ښار کې د ازبکستان له خوا د شاوخوا شپږ میلیون ډالرو په لګښت د امام بخاري په نوم د یوې لویې دیني مدرسې د جوړولو چارې پيل شوې.

په دې اړه جوړو شوو مراسمو ته مزارشریف کې د ازبکستان هېواد سرکونسل فرقت نظروف وویل چې دغه مدرسه د بلخ والي محمدیوسف وفا په وړاندیز د ازبکستان هېواد د ساختمانۍ وزارت له لوري د شاوخوا شپږ میلیونه ډالرو په لګښت جوړېږي.

نوموړی زیاتوي چې د خیرالمدارس امام بخاري په نوم دغه مدرسه په ۱۲ هکټاره ځمکه جوړېږي چې درې هکټاره ځمکه یې مدرسې او پاتې نوره برخه یې د جومات، لیلیې او په راتلونکو کې د نورو پلانونو د تطبیق لپاره ځانګړې شوې ده.

د نظروف په وینا، د دغې مدرسې چارې د ازبکستاني انجینرانو پر مټ د راتلونکو یوه کال په موده کې بشپړېږي چې د شاوخوا ۱۰۰۰ زده‌کوونکو د زده‌کړو ظرفیت به ولري.

په همدې حال کې د بلخ ولایت د اطلاعاتو او فرهنګ رییس ذبیح‌الله نوراني د ازبکستان هېواد له لوري د دې مدرسې جوړول د ښه ګاونډیتوب او له یاد هېواد سره د ښو اړیکو درلودو نښه بولي.

هغه زیاتوي چې افغانستان له ازبکستان سره قوي اړیکې لري او دغه اړیکې کولای شي چې د دواړو هېوادونو د ستونزو حل برخه کې ګټورې تمامې شي.

بلخوا د بلخ ولایت پوهنې رییس عبدالجلیل شهیدخېل وایي چې د دې مدرسې په جوړېدو ټول ولس خوښ دی او یاده مدرسه کې به دیني او عصري علوم دواړه تدریس کېږي.

هغه دغه راز وایي چې د اسلامي امارت له واکمنیدو وروسته د افغانستان او ازبکستان هېواد اړیکې پیاوړې شوې دي.

د بلخ پوهنې ریاست د مسوولینو د معلوماتو له مخې، دا مهال په بلخ ولایت کې ۱۳۰۰ دولتي او خصوصي دیني مدرسې فعالیت لري چې څه باندې ۱۰۰ زره کسان په کې زده‌کړې کوي.