[restrict paid="true"]
<p style="text-align: justify;">کابل (پژواک، ۳ وږی ۱۴۰۳): د ترانسپورټ او هوایي چلند وزارت وایي چې پخوا په هرو ۲۴ ساعتونو کې د افغانستان له فضا تر ۱۱۰ پورې عبوري الوتنې ترسره کېدې، خو اوس یې شمېر ۲۶۰ ته رسېدلی دی.</p>
<p style="text-align: justify;">د یاد وزارت ویاند امامالدین احمدي نن پژواک خبري اژانس ته وویل چې د افغانستان له فضایي حریم څخه د ملکي الوتنو په شمېر کې زیاتوالی راغلی.</p>
<p style="text-align: justify;">دی وایي، له دې مخکې په هرو ۲۴ ساعتونو کې له ۱۰۰ تر ۱۱۰ پورې عبوري الوتنې ترسره کېدې.</p>
<p style="text-align: justify;">هغه زیاته کړه، اوس په هرو ۲۴ ساعتونو کې له ۲۶۰ تر ۲۶۵ پورې عبوري الوتنې ترسره کېږي چې نږدې دوهنیم برابره ډېروالی ښيي.</p>
<p style="text-align: justify;">د ده په وینا، دا چاره ثابتوي چې د افغانستان فضا خوندي ده او د ملکي عبوري الوتنو لپاره ښه او لنډه لاره ده.</p>
<p style="text-align: justify;">د احمدي د معلوماتو له مخې، د یو شمېر بهرنيو معتبرو هوایي شرکتونو الوتکې دا مهال افغانستان ته الوتنې لري.</p>
<p style="text-align: justify;">رویټرز خبري اژانس وړمه ورځ راپور ورکړی و چې منځني ختیځ کې د کړکېچ په زیاتېدو سره سنګاپور ایرلاینز، بریټانیا ایرلاینز او لوفټانزا هوایي شرکتونو د افغانستان پر فضا الوتنې زیاتې کړې دي.</p>
<p style="text-align: justify;">راپور کې راغلي چې دغه شرکتونه اوسمهال د افغانستان فضا د یوې خوندي هوایي لارې په توګه د خپلو الوتنو لپاره کاروي.</p>
<p style="text-align: justify;">دا په داسې حال کې ده چې درې کاله مخکې افغانستان کې له سیاسي بدلون وروسته ډېرو نړۍوالو هوایي شرکتونو د افغانستان له فضا الوتنې بندې کړې وې.</p>
[/restrict]
