«تېر یوه کال کې څه باندې ۷۴ زره کسانو ته د تخنیکي او مسلکي زده‌کړو زمینه برابره شوې ده»

کابل (پژواک، ۱۹ وږی ۱۴۰۳): د افغانستان د کار او ټولنیزو چارو وزارت وايي چې تېر یوه کال کې په ټول هېواد کې د زده‌کړو په دولتي او غیردولتي مرکزونو کې څه باندې ۷۴ زره کسانو ته په بېلابېلو برخو کې د تخنیکي او مسلکي زده‌کړو زمینه برابره شوې ده.

دغه څرګندونې نن (دوشنبې) په کابل کې د کار او ټولنیزو چارو وزارت مسوولینو د حکومتي ادارو د یو کلنو لاسته‌راوړنو د تشریح په پروګرام کې وکړې.

د کار او ټولنیزو چارو وزارت ویاند سمیع‌الله ابراهیمي وویل چې تېر یوه کال  کې د بازار اړتیا ته په کتو په مرکز او ولایتونو کې د زده‌کړو په حکومتي او غیرحکومتي مرکزونو کې ۷۴ زره او ۷۳۸ کسانو ته په بېلابېلو برخو کې د تخنیکي او مسلکي زده‌کړو زمینه برابره شوې ده.

هغه زیاته کړه چې دغه وزارت د بېکارۍ کچې ټیټېدو په موخه د ارګ په سلام‌خانه ماڼۍ کې د «کاري ملي کنفرانس» جوړ کړ.

هغه وویل چې په دې غونډه کې له ۱۵ حکومتي ادارو سره هوکړه‌لیکونه لاسلیک شول چې پر بنسټ به یې په راتلونکو پنځو کلونو کې ۱.۵ میلیون کسانو ته په مستقیم او غیرمستقیم ډول د کار زمینه برابره شي.

هغه زیاته کړه چې ۱۱۸ زره او ۷۵۵ کورنیو او درې زره او ۳۸۱ بهرنیو وګړو ته د کار جوازونو ورکړل شوي چې له دې ډلې شاوخوا ۲۵ زره د کار جوازونه په مختلفو برخو کې ښځو او پاتې نور نارینه‌وو ته وېشل شوي دي.

په همدې حال کې، د کار او ټولنیزو چارو وزارت مرستیال مولوي محمدزاهد احمدزي په دې ناسته کې وویل چې په دې موده کې ۶ زره او ۳۴۱ یتیم او بې‌سرپرسته ماشومان په روزنیزو دولتي مرکزونو کې روزل شوي دي.

هغه زیاته کړه چې د وزارت په چوکاټ کې د کار د تفتیش په نوم یو ریاست دی چې د کارګرانو د ستونزو د حل په موخه د هرې فابریکې څېړنه کوي.

احمدزي څرګنده کړه چې د ادارو کاري پلان د اسلامي امارت مشرتابه ته استول شوی او د هغه توشیح ته په تمه دي.