جلالاباد (پژواک، ۱۱ تله ۱۴۰۳): د ننګرهار د عدليې رياست له لوري د دغه ولایت د غنيخېلو ولسوالۍ په مارکو بازار کې ۱۵ موټرپلورنځي د غيرقانوني فعاليت له امله تړل شوي دي.
د ننګرهار د اطلاعاتو او فرهنګ رياست د اطلاعاتو امر مولوي صديقالله قريشي د تلې په ۱۱مه پژواک خبري اژانس ته وويل، د عدليې رياست مسوولينو د غنيخېلو ولسوالۍ اړوند په مارکو بازار کې ۱۵ موټرپلورنځي د غيرقانوني فعاليتونو له امله تړلي دي.
د قريشي د معلوماتو له مخې، د عدليې رياست ټیمونو د سوداګريزو شرکتونو، د معاملاتو لارښوونې مرکزونو، موټرپلورنځيو او نورو برخو کې خپله څارنه پيل کړې څو د غیرقانوني فعالیتونو مخه ونیسي.
د ننګرهار اوسېدونکي هم د عدليې رياست د دې کړنو ستاينه کوي او وايي، موټرپلورنځي او د معاملاتو لارښوونې دفترونه مهم ځايونه دي، باید فعالیت یې قانوني وي.
د غنيخېلو ولسوالۍ د مارکو بازار يو اوسېدونکی رحمتالله وايي، په دې سيمه کې د موټرو د خرڅلاو ډېر موټرپلورنځي شته چې کله ناکله د غلا او غيرقانوني موټر هم پلوري.
هغه زیاتوي، دا چاره اکثریت هغو موټرپلورنځيو کې کېږي چې قانوني جوازونه نه لري.
د یادونې ده، له دې مخکې هم د ننګرهار عدليې ریاست په جلالاباد ښار کې د موټر پلورنځيو اتحاديې په ګډون ۱۳ موټرپلورنځي د غيرقانوني فعاليت له امله تړلي وو.
