<p style="text-align: justify;">کابل (پژواک، ۱۹ لړم ۱۴۰۳): د افغانستان د ټولګټو وزارت وايي چې د دغه وزارت د اوسپنې پټلۍ مرستيال د ازبکستان پلازمېنه تاشکند کې د مشترکالمنافع هېوادونو رېلي ترانسپورټ شورا په ۸۱مه غونډه کې ګډون کړی دی.</p>
<p style="text-align: justify;">د افغانستان ټولګټو وزارت د یوې <strong><a href="https://mopw.gov.af/index.php/ps/%D8%AF-%D9%BC%D9%88%D9%84%DA%AB%D9%BC%D9%88-%D9%88%D8%B2%D8%A7%D8%B1%D8%AA-%D8%AF-%D8%A7%D9%88%D8%B3%D9%BE%D9%86%D9%8A%D8%B2%DB%90-%DA%A9%D8%B1%DA%9A%DB%90-%D9%85%D8%B1%D8%B3%D8%AA%D9%8A%D8%A7%D9%84-%D8%AF-%DA%AB%DA%89%D9%88-%DA%AB%D9%BC%D9%88-%D9%87%D9%8A%D9%88%D8%A7%D8%AF%D9%88%D9%86%D9%88-%D8%AF-%D8%B1%D9%8A%D9%84%D9%8A-%D9%BC%D8%B1%D8%A7%D9%86%D8%B3%D9%BE%D9%88%D8%B1%D9%BC-%D8%B4%D9%88%D8%B1%D8%A7-%D9%BE%D9%87-%DB%B8%DB%B1-%D9%85%D9%87-%D8%BA%D9%88%D9%86%DA%89%D9%87-%DA%A9%DB%90%D8%8C">خبرپاڼې</a> </strong>په خپرولو لیکلي چې په ياده غونډه کې د دغه وزارت د اوسپنې پټلۍ د مرستيال مولوي محمداسحاق صاحبزاده په مشرۍ لوړپوړي پلاوي ګډون کړی دی.</p>
<p style="text-align: justify;">خبرپاڼه کې راغلي چې په یاده ناسته کې د اوسپنې پټلۍ چارو کې پر نړۍوالو همکاریو او د رېل پټلۍ او ټکنالوجۍ پر بنسټيزه پراختیا خبرې شوې دي.</p>
<p style="text-align: justify;">سرچینې زیاته کړې چې د يادې غونډې په څنډه کې مولوي محمداسحاق صاحبزاده د قزاقستان، تاجکستان او ازبکستان د رېلپټلیو له مسوولينو سره د بېلابېلو ناستو په ترڅ کې د رېلي ګډو پروژو عملي کېدو او له دې لارې د سوداګريزو توکو د لېږد رالېږد د حجم پر ډېرېدو ټینګار شوی دی.</p>
<p style="text-align: justify;">د ویلو ده، د مشترکلامنافع هېوادونو رېلي ترانسپورټ شورا په ۱۹۹۲م کال کې تاسیس شوې او یو نړۍوال سازمان دی چې د غړو هېوادونو ترمنځ د رېلي ترانسپورټ برخه کې د همکارۍ او همغږۍ رامنځته کولو په موخه جوړه شوې ده.</p>
<p style="text-align: justify;">ياده شورا هڅه کوي چې د ترانسپورټي، په ځانګړې توګه د رېلي ترانسپورټ خدمتونو کیفیت ښه کړي، موثریت يې ډېر کړي او د دې شورا د غړو هېوادونو د رېلپټلۍ په سیسآم کې لګښتونه کم کړي.</p>
<p style="text-align: justify;">افغانستان په دې وروستيو کې په ياده شورا کې د څارونکي غړي په توګه تصويب شوى او د کورنيو چارو د طی مراحلو له بشپړېدو سره به افغانستان په رسمي ډول په دې شورا کې د څارونکي غړيتوب ترلاسه کړي.</p>
