دایکنډي کې د والیبال سیالۍ پیل شوې

نیلي (پژواک، ۱۹ لړم ۱۴۰۳): دایکنډي کې ورزشي مسوولین وايي چې «د دایکنډي د والیبال کلپونو جام» په نوم سیالۍ پرون د دغه ولایت په مرکز نیلي ښار کې پیل شوې.

د دایکنډي د بدني روزنې او ورزش امر ناصر حقیقت وایي چې دغه سیالۍ پرون د دغه ولایت د والیبال فدراسیون په استازولۍ، د بدني روزنې اړوندو ادارو او اطلاعاتو او فرهنګ ریاست له لوري پیل شوې دي.

هغه زیاته کړه، په دې سیالیو کې د دایکنډي په کچه اوو ټیمونو ګډون کړی دی.

د هغه په خبره، دغه سیالۍ چې د دوو لوبډلو ترمنځ د لوبې په کولو پیل شوې، یوه اونۍ به دوام وکړي.

یادې سیالۍ ورزش ته د ځوانانو هڅولو او ټولنیزو ورزشونو ته د ودې او پراختیا ورکولو په موخه جوړه شوې دي.