م.م پنجشېر کې د کانونو، کرنې او ګرځندوی برخو کې د همکارۍ لپاره چمتووالی وښود

کابل (پژواک، ۲۱ لړم ۱۴۰۳): د افغانستان لپاره د ملګرو ملتونو د سرمنشي ځانګړي استازي د پنجشېر له والي سره په لیدنه کې ویلي، دغه سازمان چمتو دی څو په پنجشېر کې د کانونو، کرنې، چاپېریال‌ساتنې، ګرځندوی صنعت، روغتیایي او ښوونیزو خدماتو ښه کېدو برخو کې همکاري وکړي.

په هغې خبرپاڼه کې چې نن د پنجشېر ولایت د رسنیو دفتر له خوا خپره شوې راغلي چې په افغانستان کې د ملګرو ملتونو ځانګړي استازي روزا اتونبایوا د پنجشېر له والي حافظ محمداغا حکیم سره په دغه ولایت کې لیدلي دي.

د پنجشېر والي په دې لیدنه کې د روغتیایي خدماتو، زده‌کړو، اقتصادي او زېربنايي برخو کې د دغه ولایت مهمې ستونزې د ملګرو ملتونو له استازي سره شریکې کړې او له هغه یې د دې ستونزو د هواري لپاره د همکارۍ غوښتنه کړې ده.

حافظ محمداغا حکیم د پنجشېر د بنسټیزې او رغنیزې پراختیا برخې ته د لومړۍ درجه ډونرانو پر مرستو او د نړۍوالو موسسو پر راجذبولو ټینګار کړی او د ولایتي روغتون، سړکونو، پلونو، کانالونو او استنادي دېوالونو جوړېدل یې د دغه ولایت د خلکو اساسي اړتیاوې یادې کړې دي.

هغه دغه ‌راز د پنجشېر د ښه امنیت په اړه هم خبرې کړې او ویلي یې دي چې دغه ولایت د خلکو د خدمت او د اقتصادي پراختیا لپاره مناسب بستر دی.

د پنجشېر والي د ستونزو، په ځانګړي ډول د پنجشېر د اوسېدونکو د اقتصادي ستونزو د حل برخه کې د سیمه‌ییزې ادارې د هڅو یادولو ترڅنګ ویلي چې د پوهنې برخه کې د بې‌سوادۍ د له منځه وړو او ظرفیت جوړونې لپاره پراخ اقدامات د ترسره کېدو په حال کې دي، هغه دغه ‌راز د پنجشېر د ښځو لپاره د حرفوي او نورو زده‌کړو زمینې برابرولو غوښتنه وکړه.

د خبرپانې له مخې، په دې لیدنه کې روزا اتونبایوا ویلي چې پنجشېر د بېلابېلو رغنیزو او اقتصادي پروژو لپاره مناسب  بستر دی، هغه زیاته کړې چې ملګري ملتونه چمتو دي څو په دغه ولایت کې د کانونو، کرنې، چاپېریال‌ساتنې، ګرځندوی صنعت، روغتیا او زده‌‌کړو برخو کې همکاري وکړي.

اتونبایوا دغه ‌‌راز د پنجشېر د کانونو او زېربناوو برخو کې د پانګونې لپاره د بېلابېلو هېوادونو د سفیرانو او نړۍوالو سوداګریزو شرکتونو د لېوالتیا په اړه ویلي چې ملګري ملتونه به هڅه وکړي څو هغوی دغه ولایت ته راجذب کړي.

د ملګرو ملتونو استازي دغه ‌راز په پنجشېر کې د ګرځندوی صنعت د ودې پر اهمیت ټینګار کړی او زیاته کړې یې ده چې د دغه ولایت طبیعي ځایونو او د ګرځندوی امکاناتو ته په کتو پنجشېر کولای شي چې د داخلي او بهرني ګرځندوی په اصلي مرکز تبدیل شي او دا موضوع کولای شي چې د دغه ولایت د خلکو په اقتصادي وده کې مرسته وکړي.

هغه ویلي، ملګري ملتونه هڅه کوي څو د اقلیمي تغییراتو نړۍ‌وال کنفرانس کې چې په باکو کې ترسره کېږي، د اسلامي امارت له استازو سره کار وکړي څو نړۍ په دې برخه کې له افغانستان سره مالي مرسته وکړي.

د ملګرو ملتونو ځانګړي استازي ویلي چې ملګري ملتونه به په نږدې راتلونکي کې د پنجشېر د خلکو لپاره بېلابېل پروګرامونه، د هغو له ډلې کوچني پورونه هم اجرا کړي.