چین کې یوه کس د چاقو په ګوزارونو ۲۵ کسانو ته مرګ‌ژوبله اړولې

<p style="text-align: justify;">کابل (پژواک، ۲۷ لړم ۱۴۰۳): د راپورونو له مخې تېره ورځ د چین په ختیځ کې یوه ځوان په ښوونځي کې د چاقو په ګزارونو اته کسان وژلي او ۱۷ نور یې ټپيان کړي دي.</p>

<p style="text-align: justify;">رويټرز خبري اژانس نن په یوه <strong><a href="https://www.reuters.com/world/china/eight-killed-stabbing-incident-wuxi-china-2024-11-16/">راپور</a> </strong>کې ویلي، پرون ماښام مهال د چین په ختیځ کې د هنرونو او ټکنالوژۍ په یوه ښوونځي کې یوه پخواني زده‌کوونکي د چړې په ګوزارونو اته کسان وژلي او ۱۷ نور یې ټپیان کړي دي.</p>

<p style="text-align: justify;">سرچینې زیاته کړې، یاد کس چې ۲۱ کاله عمر لري د پېښې ځای کې د پولیسو له لوري نیول شوی دی.</p>

<p style="text-align: justify;">د راپورونو له مخې، بریدګر د همدې ښوونځي یو پخوانی زده‌کوونکی و او ټاکل شوې وه چې په روان میلادي کال کې فارغ شي خو په ازموینو کې ناکام شوی و.</p>

<p style="text-align: justify;">دا پېښه داسې مهال رامنځته کېږي چې همدا تېره اونۍ یوه ۶۲ کلن سړي د چین په سویل کې د ژوهي ښار په یوه ورزشي لوبغالي کې خلک په موټر ووهل چې ۳۵ تنه په‌کې ووژل شول او ۴۳ نور یې ټپيان کړل.</p>