ننګرهار کې دوه روغتيايي مرکزونه جوړ او ګټې‌ اخیستنې ته وسپارل شول

جلال‌اباد (پژواک، ۲۸ لړم ۱۴۰۳): د ننګرهار د عامې روغتيا رياست وايي، په سپين‌غر او روداتو ولسواليو یې کې د ماشومانو د ساتنې ادارې په مالي مرسته دوه روغتيايي مرکزونه جوړ کړي او نن یې ګټې اخیستنې ته سپارلي چې ۱۱۲ زره امریکايي ډالر لګښت ورباندې شوی.

د ننګرهار ولايت د عامې روغتيا رياست له لوري پژواک خبري اژانس ته رالېږل شوې خبرپاڼه کې ويل شوي چې د ماشومانو د ساتنې نړۍ‌والې ادارې (Save the Children) په مالي همکارۍ یې د ۱۱۲ زره امریکايي ډالرو په لګښت د دغه ولایت په روداتو او سپين‌غر ولسوالیو کې دوه روغتیايي مرکزونه جوړ او نن ګټې اخیستنې ته سپارلي دي.

د یاد ریاست رييس مولوي امين‌الله شریف د یادو روغتیایي مرکزونو د پرانیستې پرمهال د ماشومانو ساتنې نړۍوالې ادارې له همکارۍ مننه کړې چې د یاد ولسوالیو د خلکو لپاره يې د روغتيايي خدمتونو زمينه برابره کړې ده.

په خبرپاڼه کې د یادې ادارې د استازي محمدرحیم دانش له قوله راغلي چې پر هر روغتیایي مرکز ۵۶ زره امریکایي ډالر لګښت راغلی دی.

هغه زیاته کړې، دغه روغتيايي مرکزونه د نارینه او ښځینه‌وو کتنځایونه، د مور او ماشوم خدمتونه، ولادت خونه، واکسين خدمات، د تغذيې او رواني مشورې څانګې لري چې ناروغانو ته به په وړیا ډول درمل ورکوي او یو عراده امبولانس به هم د سختو ناروغانو د لېږد لپاره ډېر ژر په واک کې ورکړل شي.

د یادونې ده، د یادو ولسوالیو خلک خوښ دي او هیله لري چې د دغو روغتیایي مرکزونو په جوړېدو سره به یې روغتیایي ستونزې کمې شي.