سرګي شویګو: روسیه هڅه کوي افغانستان په شانګهای سازمان کې خپله څوکۍ بېرته ترلاسه کړي

کابل (پژواک، ۵ لېندۍ ۱۴۰۳): د روسیې د ملي امنیت شورا عمومي منشي ویلي هېواد یې هڅه کوي چې افغانستان په شانګهای سازمان کې د ناظر غړي په توګه خپله څوکۍ بېرته ترلاسه کړي او دغه‌راز ډېر ژر به د افغانستان او روسیې ګډ سوداګریز فورم هم پرانیستل شي.

له ارګه په خپره شوې خبرپاڼه کې راغلي چې نوموړي دغه څرګندونې د ریاست‌الوزراء له سیاسي مرستیال سره په لیدنه کې وکړې.

د یادونې ده، د روسیې د ملي امنیت شورا د عمومی منشي سرګي شویګو په مشرۍ د دغه هېواد یو پلاوی نن کابل ته راغلی.

د ریاست‌الوزراء سیاسي معاونیت په خبرپاڼه کې راغلي چې د ریاست‌الوزراء سیاسي مرستیال مولوي عبدالکبیرد روسیې فدراسیون د ملي امنیت شورا له عمومي منشي سرګي شویګو او مل پلاوي سره ولیدل.

شویګو په دغه ليدنه کې ویلي، روسیه د مسکو ـ کابل ترمنځ د سوداګریزو او اقتصادي اړیکو د پراختیا غوښتونکې ده او چمتو ده چې په افغانستان کې په بېلابېلو برخو کې بنسټیزې پروژې عملي کړي.

هغه دغه‌راز ویلي، د روسیې فدراسیون غواړي چې افغانستان په شانګهای سازمان کې د ناظر غړي په توګه خپله څوکۍ بېرته ترلاسه کړي.

د روسیې د لومړي وزیر مرستیال الکسي آویرچوک هم چې د یاد پلاوي غړی دی ویلي چې مسکو او کابل د همکاریو د زیاتېدو او اړیکو د پراختیا غوره فرصتونه لري او اړتیا ده چې له دغو فرصتونو استفاده وشي.

ده ویلي، مسکو به دغه هېواد ته د افغانستان په صادراتي توکو ګمرکي تعرفه راکمه او یا ختمه کړي.

د ده په خبره، هېواد یې چمتو دی چې له افغانستان سره د ټرانسپورټ په برخه کې د همکاریو هوکړه‌لیک لاسلیک کړي او ډېر ژر به د افغانستان او روسیې ګډ سوداګریز فورم هم پرانیستل شي.

هغه وړاندیز کړی چې د دواړو هېوادونو ترمنځ د همکاریو د پراختیا او د بنسټیزو پروژو د پیل لپاره دې تخنیکي کاري کمېټې ایجاد شي.

د ریاست‌الوزراء سیاسي مرستیال مولوي عبدالکبیر ویلي، افغانستان له روسیې سره په مختلفو برخو کې د اړیکو او تعامل پراخېدو ته لېواله دی او اسلامي امارت خپلې ملي ګټې او د خپل هېواد امنیت، ثبات او اقتصادي وده د سیمې له امنیت، ثبات او ښېرازۍ سره تړلي بولي.

هغه زیاته کړې، اسلامي امارت اجازه نه ورکوي چې د افغانستان خاوره د چا پر ضد وکارول شي او غواړي چې د یوه مسوول نظام په توګه په سیمه‌ییزو فارمټونو کې معناداره حضور ولري او له سیمه‌ییزو هېوادونو سره له نږدې کار وکړي.

سیاسي مرستیال ویلي: «اسلامي امارت په هېڅ هېواد کې جګړه نه غواړي، بلکې د سیمې د پرمختګ او ثبات لپاره اړتیا ده چې له یو بل سره همکاري وکړو او د تقابل پر ځای باید د خبرو اترو له لارې توافق ته ورسېږو.»

هغه دغه‌راز ویلي، اسلامي امارت له ټولو هېوادونو سره د اقتصادي همکاریو پراختیا او د سیمه‌ییزو پروژو عملي کول غواړي او لېواله دی چې د روسیې سوداګر او پانګوال په افغانستان کې پانګونې وکړي.