میدان‌وردګو کې د والیبال سیالۍ د میدان اتلانو لوبډلې په اتلولۍ پای ته ورسېدې

<p style="text-align: justify;">میدان‌ښار (پژواک، ۲۴ لېندۍ ۱۴۰۳): د میدان‌وردګو لایت په مرکز کې د شپږو ولایتونو د ۲۴ لوبډلو ترمنځ د والیبال سیالۍ د میدان اتلانو لوبډلې په اتلولۍ پای ته ورسېدې.</p>

<p style="text-align: justify;">د میدان‌وردګو د والي ویاند وحیدالله سروري پژواک خبري اژانس ته وویل چې یوه اونۍ مخکې د دغه ولایت په مرکز کې د میدان‌وردګو، کابل، کاپیسا، لوګر، ننګرهار او کونړ ولایتونو د ۲۴ لوبډلو ترمنځ د والیبال سیالۍ پیل شوې.</p>

<p style="text-align: justify;">هغه وايي چې د یادو سیالیو پای‌لوبې ته د میدان اتلان او ځواک میدان‌ښار لوبډلو لار ومونده.</p>

<p style="text-align: justify;">نوموړي وویل چې میدان اتلانو لوبډلې درې د صفر پر وړاندې خپلې سیالې لوبډلې ته ماته ورکړه او اتلولي یې ترلاسه کړه.</p>

<p style="text-align: justify;">د نوموړي د معلوماتو له مخې، دغه سیالۍ د ورزشکارانو ترمنځ د یووالي او تجربو شریکولو په موخه ترسره شوې.</p>

<p style="text-align: justify;">بل لور ته، لوبغاړي هم د یادو سیالیو ترسره کېدو ته خوښ دي.</p>

<p style="text-align: justify;">د کونړ ولایت یوه لوبغاړي ادم‌خان پژواک ته وویل، ډېر خوښ دی چې دوی ته په میدان‌وردګو ولایت کې د سیالیو زمینه برابره شوې وه.</p>

<p style="text-align: justify;">هغه له مسوولینو غوښتنه وکړه چې د هېواد په کچه ورته سیالۍ جوړې کړي څو د لوبغاړو ترمنځ همغږي رامنځته او تجربې شریکې شي.</p>

<p style="text-align: justify;">د یادونې ده، د یادو سیالیو په پای کې غوره لوبډلو ته شل - شل زره افغانۍ او کپونه او غوره لوبغاړو ته مډالونه او نورې جایزې ورکړل شوې.</p>