تېرو درېیو کلونو کې هېواد کې پر نشه‌یي توکو د ۱۳۵ زره روږدو کسانو درملنه شوې

کابل (پژواک، ۱۱مرغومی ۱۴۰۳): کورنیو چارو وزارت وایي، پر نشه‌يي توکو د روږدو کسانو پر درملنه په کلني ډول یو میلیارد افغانۍ لګښت راځي او په تېرو څه باندې درېیو کلونو کې د افغانستان په کچه د ۱۳۵ زره روږدو درملنه شوې ده.

یادې څرګندونې نن د کورنیو چارو وزارت مسوولینو د کابل ښار څرخي پله سیمه کې د اغوش ۵۰۰۰ بستریز له مرکزه له نشه‌یي توکو د ۳۲ تنو رغېدلو کسانو د قران کریم قرائت او تجوید څځه د فراغت په مراسمو کې وکړې.

 کورنیو چارو وزارت د نشه‌یي توکو پر وړاندې د مبارزې معینیت مرستیال ملا عبدالحق همکار په دغه غونډه کې وویل، د روږدو پر درملنه په کلني ډول یو میلیارد افغانۍ لګښت راځي.

دی وايي، یاد لګښت د اسلامي امارت له بوديجې ورکول کېږي.

د یاد وزارت د نشه‌یي توکو پر وړاندې د مبارزې معینیت ملکي مرستیال مولوي عبدالرحمان قاسمي وویل چې دا مهال د افغانستان په لسو ولایتونو کې د روږدو درملنې لپاره ۱۱ فعال حمایوي مرکزونه شته چې د زرګونو کسانو د درملنې ظرفیت لري.

دی وايي، فعال حمایوي مرکزونه کابل، هرات، کندهار، بلخ، نیمروز، کندز، غزني، فراه، هلمند او دایکندي ولایتونو کې موقعیت لري.

هغه زیاته کړه، په تېرو څه باندې درېیو کلونو کې د افغانستان په کچه ۱۳۵ زره روږدي راټول شوي او درملنه یې شوې ده.

دی زیاتوي چې اوسمهال د افغانستان په یو شمېر ولایتونو کې ۱۳۷۵۲ روږدي تر درملنې لاندې دي.

بل لور ته، احمد فرید چې د کابل اصلي اوسېدونکی دی او د نشه‌يي توکو له کارولو رغېدلی پژواک ته یې وویل، څلور کاله مخکې یې د بې‌کارۍ له امله د نشه‌یي توکو کارولو ته مخه کړې وه.

دی وايي، خوښ دی چې درملنه یې وشوه او زیاتوي چې د قران تجوید یې زده کړی او له ځوانانو یې وغوښتل چې نشه‌یي توکو ته مخه نه کړي.