<p style="text-align: justify;">کابل (پژواک، ۲۰ مرغومی ۱۴۰۳): د کابل ښار اوولسمې ناحیې اړوند سیمو کې د څه باندې ۱۶ میلیون افغانیو په لګښت د دوو فرعي سړکونو د جوړولو چارې بشپړې شوې.</p>
<p style="text-align: justify;">د کابل ښاروالۍ نن پرخپله اېکسپاڼه لیکلي چې د ۱۷مې ناحیې اړوند ۱۸م ګذر د وحدت ښوونځي او د ۴۳م ګذر د سلیمانخېلو په سیمو کې د دوو فرعي سړکونو د جوړولو چارې بشپړې شوې.</p>
<p style="text-align: justify;">سرچینې لیکلي، په ۱۸م ګذر کې سړک ۷۰۲ متره اوږدوالی او په ۴۳م ګذر کې ۶۰۰ متره اوږدوالی او له ۴،۵ تر ۶،۵ مترو پورې سور لري.</p>
<p style="text-align: justify;">سرچینه زیاتوي، د لښتیو په ګډون د دغو فرعي سړکونه د جوړولو چارې د څه باندې ۱۶ میلیون افغانیو په لګښت د درېیو میاشتو په موده کې بشپړې شوې دي.</p>
<p style="text-align: justify;">د سرچینې په حواله، په راتلونکي کې به د دې ناحیې په کچه ورته نورې پروژې هم طرحه او پلي شي څو له یوې خوا ښاریانو ته ټرانسپورټي او ټولنیزې اسانتیاوې برابرې او له بلې خوا به یوشمېر خلکو ته د کارکولو زمینه برابره شي.</p>
<p style="text-align: justify;">د سرچینې د معلوماتو له مخې، د سیمې اوسېدونکو د یادو پروژو له بشپړېدو خوښي وښوده او ژمنه یې وکړه چې د نویو جوړو شوو سړکونو په ساتنه کې به له کابل ښاروالۍ سره مرسته وکړي.</p>
